Arion banki kannar nú hvort selja eigi Blikastaða­land í heild eða að hluta, fá meðfjár­festa að verk­efninu eða setja það í far­veg sem gæti leitt til skráningar. Fyrsti áfangi deili­skipu­lags svæðisins er nú til­búinn, en þar er gert ráð fyrir 1.260 íbúðum. Þetta kemur fram í fjár­festa­kynningu Arion banka vegna upp­gjörs fyrsta árs­fjórðungs. Þar segir að bankinn hafi leitt þróun Blikastaða­lands í gegnum dóttur­félagið Blikastaða­land ehf., sem er al­farið í eigu bankans, í nánu sam­starfi við Mos­fells­bæ. Fyrsti áfangi deili­skipu­lagsins er nú frá­genginn og segir Arion að með því hafi mikilvægum áfanga verið náð í verk­efninu. Fyrsti áfanginn er einn af þremur og gerir ráð fyrir 1.260 íbúðum. Þar af verða 1.055 íbúðir í fjöl­býlis­húsum, 88 íbúðir í fjór­býlis­húsum, 53 í raðhúsum, 34 í par­húsum og 30 í ein­býlis­húsum. Í kynningunni segir að fyrsti áfanginn sé nú orðinn til­búið íbúða­verk­efni fyrir fjár­festa. Þá leggur bankinn áherslu á að fjöl­breytt sam­setning íbúða eigi að mæta breiðri eftir­spurn á húsnæðis­markaði. Arion segir að áherslan til þessa hafi verið á skipu­lags­vinnu og að draga úr áhættu verk­efnisins, fremur en að selja það hratt. Með því hafi bankinn skapað sér aukið svigrúm til lengri tíma. Teikning af atvinnukjarna Reita á Blikastöðum © Aðsend mynd (AÐSEND) Nú sé bankinn hins vegar farinn að skoða næstu skref. Í kynningunni segir að til skoðunar sé að selja hluta verk­efnisins, selja það í heild eða fara í sam­starf við aðra fjár­festa. Slíkt sam­starf gæti að sögn bankans falið í sér fyrir­komu­lag sem yki seljan­leika hluta í verk­efninu, meðal annars með skráningu. Ákvörðun um fram­haldið verður sam­kvæmt kynningunni tekin út frá hags­munum hlut­hafa, markaðsaðstæðum og því hvernig best sé að nýta efna­hags­reikning og eigið fé bankans. Blikastaða­land er ein stærsta þróunar­eign Arion banka. Í árs­hluta­reikningi bankans kemur fram að fjár­festingar­eignir hans námu 7,4 milljörðum króna í lok mars, saman­borið við 7,3 milljarða króna í árs­lok. Blikastaðalandið. © Trausti Hafliðason (VB) Þar kemur jafn­framt fram að fjár­festingar­eignir séu færðar á gang­virði og að breytingar á virði þeirra fari í gegnum rekstrar­reikning bankans. Blikastaðir voru einnig nefndir sér­stak­lega meðal helstu rekstrar­legra tíðinda Arion á fyrsta fjórðungi. Í sömu kynningu kom fram að bankinn hefði lokið sölu á þróunar­eigninni Arnar­landi á fjórðungnum.