Michael Rasmus­sen, for­stjóri Nykredit, stendur fast við ummæli sín um að vöxtur beinna bankaíbúðalána geti grafið undan danska íbúðalána­kerfinu. Þetta kemur fram í viðtali Børsen við Rasmus­sen, en hörð átök hafa geisað á danska fjár­mála­markaðnum um málið síðustu vikur. Við­skipta­blaðið hefur fjallað um deiluna á síðustu dögum en stærstu bankar Dan­merkur, Danske Bank og Nor­dea, hafi aukið vægi beinna bankalána til húsnæðis­kaupa. Slík lán eru veitt beint af bönkum og fjár­mögnuð með inn­lánum og öðrum leiðum. Hefðbundnu dönsku veðlánin eru hins vegar veitt af sér­hæfðum lána­stofnunum og fjár­mögnuð með skulda­bréfaút­gáfu. Bein íbúðalán hafa lengi verið til í Dan­mörku en hafa aðal­lega verið notuð til að fjár­magna þann hluta kaup­verðs sem ekki fæst veðlán fyrir, það er yfir 80% af fast­eigna­verði. Nú hafa bankarnir hins vegar farið að bjóða þeim sem teljast góðir við­skipta­vinir, fólki með háar tekjur, góðar eignir og gott láns­hæfi, betri kjör á slíkum lánum. Rasmus­sen sagði í sam­tali við Børsen fyrir tveimur vikum að danska fast­eigna­lána­kerfið væri undir þrýstingi vegna þróunarinnar og kallaði eftir því að stjórn­mála­menn tækju um­ræðuna. Carsten Egeriis, for­stjóri Danske Bank, hefur hafnað þeim mál­flutningi og sakað Rasmus­sen um hræðsluáróður, eins og Við­skipta­blaðið greindi frá í vikunni. Sjá einnig Ásakanir ganga á víxl milli banka­stjóra: „hræðsluáróður“ Í nýju viðtali við Børsen segir Rasmus­sen að Nykredit standi við að „gat sé komið á varnar­garðinn“. Hann segist þó ekki vera að kalla eftir til­teknum að­gerðum, heldur breiðri pólitískri um­ræðu um hvort þróunin sé að eiga sér stað og hverjar af­leiðingarnar geti orðið. Hann segir Nykredit sjá breytta markaðs­dýna­mík í eigin tölum. Bankinn er stærsti veðlána­veitandi Dan­merkur og er með um 54% af markaðnum. Rasmus­sen heldur því fram að hættan felist í því að hag­kvæmustu við­skipta­vinirnir færist úr hefðbundnum veðlánum yfir í bankaíbúðalán. Það geti með tímanum haft áhrif á verðlagningu veðlána fyrir aðra lántak­endur, einkum á lands­byggðinni og hjá þeim sem hafa ekki jafn sterka fjár­hags­stöðu. Nykredit hefur áður sagt að bankaíbúðalán henti fyrst og fremst betur settum lántak­endum en að hefðbundin veðlán séu áfram „ódýrasta, gegnsæjasta og öruggasta fjár­mögnunin fyrir lang­flesta“. Rasmus­sen hefur jafn­framt sagt að tryggja verði að komandi kynslóðir, sér­stak­lega fyrstu kaup­endur, hafi áfram að­gang að hag­kvæmum veðlánum óháð eignum, póstnú­meri eða launa­tekjum. Deilan hefur einnig valdið spennu innan Finans Dan­mark, sam­taka fjár­mála­fyrir­tækja í Dan­mörku. Rasmus­sen er for­maður sam­takanna, en bæði Danske Bank og Nor­dea hafa tekið aðra af­stöðu í málinu. Lars Gert Lose, fram­kvæmda­stjóri Finans Dan­mark, hefur sam­kvæmt Børsen sagt að spurningar hafi vaknað um hvort samtökin geti rúmað svo ólíkar stöður. Rasmus­sen segir hins vegar að fjár­mála­fyrir­tækin séu sammála um mun fleira en þau séu ósammála um. Sjá einnig Óvenju­legur fundur hjá stjórn­endum fjár­mála­kerfisins Hann bendir þó á að Nykredit sé ólíkt keppi­nautunum; félagið sé í eigu félags­manna, ekki skráð á markað, og hafi lánað til húsnæðis­kaupa um allt land í gegnum tíðina. „Þeir eru skráðir á markað, við erum í eigu félags­manna. Við lánum peninga um allt land og höfum alltaf gert,“ segir Rasmus­sen við Børsen. Hann segir því eðli­legt að Nykredit líti málið öðrum augum en skráðir við­skipta­bankar. Sam­kvæmt honum snýst málið ekki aðeins um sam­keppni á húsnæðislána­markaði heldur um hvort danska kerfið, sem hefur byggt á breiðum að­gangi að skulda­bréfa­fjár­mögnuðum veðlánum, geti veikst ef stærri hluti bestu lántak­endanna færist yfir í beina banka­fjár­mögnun.