Hagar hf. og dótturfélög þess, Bónus og Olís, hafa staðfest áform um uppbyggingu nýrrar starfsemi í Þorlákshöfn á næstu misserum. Fyrirhugað er að opna nýja Bónus-matvöruverslun og Olís-sjálfsafgreiðslustöð á svæðinu. Bónus mun opna nýja matvöruverslun miðsvæðis í Ölfusi, nærri nýrri íbúabyggð við gatnamót Ölfusbrautar og Hafnarvegar. „Hjá Högum sjáum við mikil tækifæri í að þjóna ört vaxandi hópi íbúa bæjarins og nágrannasveita um dagvöru og eldsneyti í heimabyggð og að sama skapi erum við spennt fyrir því að styðja við farsæla uppbyggingu atvinnulífs á svæðinu,“ segir Finnur Oddsson, forstjóri Haga. Sjá einnig Hörð samkeppni um lóðir og íbúðir í Þorlákshöfn Sveitarfélagið Ölfus hefur verið í örum vexti á undanförnum árum og hefur íbúum fjölgað um tæp 30% frá árinu 2018. Samhliða þessari þróun hefur atvinnustarfsemi á svæðinu aukist verulega og hafnarstarfsemi styrkst en nú þegar eru um 320 íbúðir í byggingu í Þorlákshöfn. „Aukin þjónusta er lykilatriði fyrir ört vaxandi samfélag í Þorlákshöfn. Ný dagvöruverslun mun bæta verulega aðgengi íbúa að daglegum nauðsynjum og styðja við áframhaldandi uppbyggingu á svæðinu. Á næstu misserum mun miðbærinn einnig taka á sig skýrari mynd með aukinni þjónustu,“ segir Elliði Vignisson, bæjarstjóri Ölfuss.