Deilt er um hvort loðnustofninn sé vanmetinn og kvótinn of lítill miðað við hve mikil loðna fannst í janúar. Sviðsstjóri hjá Hafrannsóknastofnun hafnar alfarið kenningum formanns fjárlaganefndar Alþingis um að hægt væri að veiða hundrað þúsund tonnum meira. Loðnuskipin eru að veiðum og hrognahlutfallið loks orðið nógu hátt til að hægt sé að frysta fiskinn á best borgandi markaði í Japan. Gefinn var út næstum 200 þúsund tonna loðnukvóti og ekki útilokað að hann verði aukinn. Rannsóknarskip Hafró er að kanna hvort fiskurinn gangi vestur fyrir land líka og þannig fæst viðbótarmæling sem gæti breytt heildartölum. Loðnuveiði aðeins brot af því sem áður tíðkaðist En þó að vertíðin teljist góð miðað við nær algjöran brest undanfarin tvö ár eru ekki allir sammála um það. Sigurjón Þórðarson, formaður fjárlaganefndar Alþingis, skrifaði grein á Austurfrétt og fleiri héraðsmiðla og bendir á að í sögulegu samhengi sé vertíðin ekki stór. Á þrjátíu ára tímabili, fram til 2015, hafi meðalafli verið fjórfalt meiri en undanfarin tíu ár. Hann fullyrðir að fyrri loðnumælingin, haustmælingin, hafi mistekist og furðar sig á því að nýjasta mælingin, vetrarmæling, sé ekki látin gilda alfarið. Þá hefði heildarkvóti orðið hundrað þúsund tonnum hærri. „Það er bara alrangt“ Guðmundur Óskarsson, sviðsstjóri hjá Hafrannsóknastofnun, hafnar þessu. „Þetta er bara ekki svona einfalt. Við getum ekkert ætlað það að vetrarmælingin sé eitthvað réttari en haustmælingin þó að hún sé nær í tíma. Menn hafa verið að gefa sér það að hefðum við notað aðeins vetrarmælinguna þá hefði ráðgjöfin verið allt að 300 þúsund tonn en það er bara alrangt. Við erum búin að meta það hvað hún hefði orðið og það eru 220 þúsund tonn. Versus tæp 200 þúsund tonn sem hún var þannig að munurinn er nú ekki mikill,“ segir Guðmundur. Alltaf mikil óvissa í loðnuleitinni Óvissa sé mikil í mælingum og ekki einu sinni vitað hvort sumir þættir valdi ofmati eða vanmati. Til dæmis bergmálsmælar rannsóknarskipa skynja fiskinn. „Endurvarpseiginleikar loðnu eru aðrir á haustin en vetri og við erum ekki að geta tekið tillit til þess. Hvort er réttara vetrarmælingin eða haustmælingin - við getum ekki sagt til um það. En það getur skapast munur út af þessu,“ segir Guðmundur. Þá bendir hann á að í vetrarmælingunni fyrir austan land hafi nú verið mælt með göngustefnu loðnunnar það er skipin sigldu í sömu átt og fiskarnir syntu. „Þá ertu líklegri til að ofmeta stofninn,“ segir Guðmundur. Hann segir að loðnan sé sameiginlegur stofn og Ísland bundið af því að ákveða heildarkvóta og þar með hlutdeild annarra þjóða. Þær hafi samþykkt aflaregluna um að nota eigi báðar mælingarnar í lokaráðgjöf.