Ágætri loðnuvertíð er lokið og er það mat þeirra sem best til þekkja að útflutningsverðmæti afurðanna gæti verið í kringum 35 milljarðar króna. Það er altént mat Gunnþórs Ingvasonar, forstjóra Síldarvinnslunnar og formanns SFS. Heildarkvótinn var 197.500 tonn og af því komu um 151.000 tonn í hlut íslenskra skipa en 47.000 tonn í hlut færeyskra og grænlenskra skipa samkvæmt samningum milli þjóðanna. Samkvæmt tölum sem eru aðgengilegar á vef Fiskistofu var 23.000 tonnum af heildaraflanum landað í Færeyjum af grænlenskum og færeyskum skipum sem helgast af löndunarbið sem myndaðist hjá íslenskum uppsjávarvinnslum. Rúm 100.000 tonn af loðnunni fóru til manneldisvinnslu, þ.e.a.s. frystingar á hrygnu á markaði í Japan og hængs til Austur-Evrópu og hrognavinnslu. Markaðir tómir „Það er óhætt að segja það að þessi vertíð hafi verið ágæt og þessi vertíð sé sleggja inn í íslenskt efnahagslíf. Fiskurinn var góður og kom í rauninni í þremur göngum sem gaf okkur meiri möguleika en oft áður að framleiða yfir lengri tíma. Fyrst kom ganga að austan og svo önnur ganga þaðan og loks kom þriðja gangan, svokölluð vestanganga. Saman gaf þetta okkur meiri tíma til þess að frysta og taka hrogn. Heilt yfir var veðrið til friðs. Ég hygg því að allir framleiðendur hafi getað gert heilmikið út úr þessu miðað við oft áður enda markaðir tómir,“ segir Stefán Friðriksson, forstjóri Ísfélagsins í Vestmannaeyjum. Stefán Friðriksson, forstjóri Ísfélags Vestmannaeyja. Bjart framundan Hann segir að magnið sem mátti veiða á þessari vertíð sé eitt en tíminn sem gafst til að vinna aflann annað og hann hafi verið góður eins og fiskurinn. Meira hafi verið fryst af loðnu en hann hefði reiknað með í upphafi og það sé að einhverju leyti á kostnað hrognaframleiðslunnar sem hafi ekki verið of mikil en dugar samt til að lífga við markaðina. Hann segir erfitt að skjóta á heildarverðmætin á þessari vertíð, sérstaklega þar sem eigi eftir að semja um verð á öllum afurðum. Magn ókynþroska loðnu í haustmælingu Hafrannsóknastofnunar 2025 var það fimmta mesta frá því að mælingar hófust og benda til þess að 2024 árgangurinn sé stór, eða af svipaðri stærðargráðu og 2019 árgangurinn sem gaf mikinn afla vertíðirnar 2021/22. Niðurstöðurnar liggja til grundvallar á ráðgjöf um upphafsaflamark fyrir næsta fiskveiðiár sem Alþjóðahafrannsóknaráðið gefur út í júní næstkomandi. Stefán segir samt að ekki er kálið ekki sopið þótt í ausuna sé komið. Þetta séu þó auðvitað jákvæð tíðindi en ekki síður allt það magn sem skilaði sér til hrygningar á nýlokinni vertíð.