Kerecis jók tekjur sínar lítil­lega á síðasta árs­fjórðungi þrátt fyrir mikla röskun á bandaríska markaðnum fyrir líftækni­legar sára­vörur. Colop­last, móðurfélag Kerecis, birti upp­gjör sitt í vikunni en það var í stórum dráttum í samræmi við af­komu­viðvörun félagsins frá síðasta mánuði. Guð­mundur Fer­tram Sigur­jóns­son, stofnandi Kerecis, segir að markaðurinn hafi gengið í gegnum gríðar­lega breytingu á skömmum tíma. „Göngu­deildar­markaðurinn fyrir sáraroðið okkar minnkaði um 10,3 milljarða dollara milli árs­fjórðunga, sem sam­svarar um 1300 milljörðum króna, sem sagt gríðar­miklar markaðs­ham­farir,“ segir Guð­mundur Fer­tram í sam­tali við Við­skipta­blaðið. „Þrátt fyrir þetta erum við með smávægi­legan jákvæðan vöxt sem drifinn er áfram af góðum tveggja stafa vexti í sölu vegna með­ferðar á inni­liggjandi sjúklingum á legu­deildum. Þegar við komum svo inn á næsta fjár­hagsár og göngu­deildar­tekjurnar eru horfnar úr tekju­grunninum okkar munum við snúa aftur til öflugs tveggja stafa vaxtar eins og við höfum verið vön undan­farin ár,“ segir Guð­mundur Fer­tram. Helstu sam­keppnisaðilar Kerecis á bandaríska markaðnum fyrir líftækni­legar sára­vörur, Orga­nogenesis, MiMedX og Integra, hafa nú einnig birt sín árs­fjórðungs­upp­gjör. Sam­kvæmt upp­lýsingum sem Við­skipta­blaðið hefur undir höndum gefa þau skýra mynd af þeirri röskun sem orðið hefur á göngu­deildar­markaðnum í Bandaríkjunum. Markaðurinn dróst saman úr um 13 milljörðum dala í 2,7 milljarða dala milli árs­fjórðunga. Breytingarnar eru til­komnar vegna nýs fyrir­komu­lags á endur­greiðslum opin­bera sjúkra­trygginga­kerfisins í Bandaríkjunum fyrir líftækni­legar sára­vörur á göngu­deildum. Í tölvupósti til starfs­manna Kerecis lýsir Guð­mundur Fer­tram þróuninni sem 10,3 milljarða dala markaðs­hruni á einni nóttu. Sam­kvæmt árs­fjórðungs­upp­gjöri Colop­last koma um 30% af tekjum Kerecis frá göngu­deildar­notkun. Megin­hluti tekna félagsins kemur hins vegar frá legu­deildum sjúkra­húsa og hafa breytingarnar á endur­greiðslum vegna göngu­deildar­notkunar ekki áhrif þar. Auka markaðs­hlut­deild á bæði göngu­- og legu­deildum Á göngu­deildar­markaði drógust tekjur Orga­nogenesis saman um 63%, tekjur MiMedX um 60% og tekjur Integra um 50%. Sam­dráttur Kerecis á sama markaði nam 41%. Á móti jókst sala Kerecis vegna með­ferðar á inni­liggjandi sjúklingum á legu­deildum um 18%, sem er mesti vöxtur meðal helstu keppi­nauta félagsins. Til saman­burðar var enginn vöxtur hjá Orga­nogenesis á þeim markaði, 13% vöxtur hjá MiMedX og 14% vöxtur hjá Integra. Guð­mundur Fer­tram segir í tölvupósti til starfs­manna að Kerecis sé að auka markaðs­hlut­deild sína bæði á göngu­deildum og legu­deildum sjúkra­húsa. Hann segir árangurinn ekki til­viljun heldur af­rakstur stefnumótandi ákvörðunar sem tekin hafi verið haustið 2022. Þá hafi Kerecis ákveðið að að­greina skýrt starf­semi sína og leggja sér­staka áherslu annars vegar á sára­með­ferð á göngu­deildum og hins vegar á notkun vörunnar í skurðað­gerðum og með­ferð inni­liggjandi sjúklinga. Sú ákvörðun hafi ekki verið aug­ljós öllum á þeim tíma en sé nú að reynast rétt. Tekjuþróun undir væntingum Coloplast Heildar­tekjur Orga­nogenesis og MiMedX drógust saman á fjórðungnum. Kerecis skilaði hins vegar 1% vexti í heildar­tekjum þrátt fyrir mikinn sam­drátt á göngu­deildar­markaðnum. Tekjur Integra jukust um 6%, en tekju­grunnur þess félags er mun breiðari en hinna, þar sem Integra selur vörur á fleiri sviðum lækninga­vöru­markaðarins. Við kaup Colop­last á Kerecis árið 2023 gerði danska félagið ráð fyrir um 30% ár­legum vexti Kerecis fyrstu þrjú árin eftir kaupin. Breytingar á bandaríska endur­greiðslu­kerfinu hafa hins vegar haft veru­leg áhrif á markaðinn og tekjuþróunin er nú langt undir þeim væntingum á þriðja ári eftir kaupin. Guð­mundur Fer­tram segir þó í póstinum til starfs­manna að göngu­deildar­markaðurinn sé ekki að hverfa heldur að endur­stilla sig. Nýir sölu­staðir og með­ferðar­far­vegir séu að verða til, meðal annars á göngu­deildum sjúkra­húsa, á sjálf­stæðum skurð­stofum og innan bandaríska her­manna­kerfisins. Hann segir að með tímanum muni þetta skapa sjálf­bærari og rökréttari markaðs­gerð og að Kerecis sé að stað­setja sig í samræmi við það. Í póstinum segir Guð­mundur Fer­tram jafn­framt að rekstur sáraum­búða sé stöðugri en rekstur líftækni­legra sára­vara. Slíkar vörur séu vel festar í sessi á markaði og mun minna sveiflu­kenndar. Sá hluti starf­seminnar sé áfram mikilvægur fyrir stöðugri frammistöðu Kerecis á ólíkum mörkuðum. Guð­mundur Fer­tram segir niður­stöðu sína eftir upp­gjör og stjórnar­fund Colop­last vera að Kerecis sé að sigla í gegnum miklar markaðs­breytingar en styrkja undir­liggjandi stöðu sína á sama tíma. Félagið búi yfir að­greindri tækni, sterkri og vaxandi stöðu á legu­deildum sjúkra­húsa, stöðugum rekstri í sáraum­búðum og teymi sem haldi áfram að aðlagast og fram­kvæma. Það setji Kerecis í góða stöðu til að komast í gegnum núverandi markaðs­um­hverfi og koma sterkara út hinum megin.