Árið 1960 var fyrsta þátttaka Íslands í Feneyjatvíæringnum, þeim 30. í röðinni. Fulltrúarnir voru tveir af merkustu listamönnum þjóðarinnar, málarinn Jóhannes S. Kjarval og myndhöggvarinn Ásmundur Sveinsson. Birgir Thorlacius, ráðuneytisstjóri menntamálaráðuneytisins, hafði staðið í viðræðum við forráðamenn tvíæringsins um íslenska þátttöku, og menntamálaráðuneytið valdi listamennina að tillögu nefndar þar sem meðal annars sat dr. Selma Jónsdóttir, umsjónarmaður Listasafnsins. Þar sem Íslendingar áttu engan eigin þjóðarskála fengu þeir 24 metra langt sýningarrými í sal nr. 42 í ítalska skálanum, milli Portúgals og Perú, sem gerði þátttökuna fjárhagslega mögulega. Fáir Íslendingar sáu sýninguna, engar ljósmyndir hafa fundist frá henni og enginn fulltrúi stjórnvalda mætti á opnunina, hvorki ráðuneytismenn né sendiráðsmenn. Árið 1960 - Jóhannes Sveinsson Kjarval & Ásmundur Sveinsson Jóhannes Sveinsson Kjarval (1885–1972) var árið 1960 orðinn einn ástsælasti málari íslensku þjóðarinnar og hafði gegnt mikilvægu brautryðjandahlutverki í íslenskri listasögu. Málverkin tíu sem hann sýndi voru frá mismunandi tímabilum á ferli hans sem endurspegluðu þróun listamannsins. Þar á meðal voru landslagsmyndir á borð við Fölnuð blóm (um 1955), Það er gaman að lifa (1946) og leiftrandi fantasíur eins og Fornar slóðir (1943) og Íslandslag (Hvassárgljúfur) (1949–59), verk þar sem mannverur eða þjóðsögulegar hugsýnir spretta fram úr myndfletinum eða renna saman við landslagið. Hvassárgljúfur. Ásmundur Sveinsson (1893–1982) sýndi þrjá nýlega járnskúlptúra í Feneyjum, Samhljóm hnattanna (1959), Þjóðlag (1960) og Þú gafst mér að drekka (1960). Nokkrum árum áður hafði hann komist í kynni við járnið og átti sú efnisuppgötvun sterkan þátt í að vinnuaðferðir hans breyttust og formskriftin þróaðist meira í átt að abstraktlist. Í verkunum sem hann sýndi í Feneyjum var áherslan lögð á geómetrísk form, línuna og samspil hennar við rýmið. Hann nýtti jafnvel alls konar fundna hluti, svo sem rörbúta eða málm sem hann sagaði eða skar út. Samhljómur hnattanna. Sjá einnig Ís­lenskir full­trúar á Tvíæringnum Nánar er fjallað um málið í sérblaðinu Feneyjatvíæringur .