Það verða tveir Íslendingar í eldlínunni á Vetrarólympíuleikunum í Mílanó og Cortina á Ítalíu í dag. Elín Elmarsdóttir Van Pelt og Sonja Lí Kristinsdóttir verða báðar meðal keppenda í stórsvigi sem keppt er í tveimur ferðum. Fyrri ferðin hefst klukkan níu og verður hún í beinni útsendingu á RÚV 2 sem hefst klukkan 08:50. Seinni ferðin hefst svo klukkan 12:30 og verður í beinni útsendingu á RÚV. Allir keppendur sem tekst að klára fyrri ferðina fara einnig seinni ferðina. Að venju verður keppt í fjölda greina í dag og verða alls tólf útsendingar á rásum RÚV frá keppni dagsins.