Íshildur Agla Lingþórsdóttir hefur tekið við stöðu aðstoðarfjármálastjóra hjá Íslenska gámafélaginu. Hún hefur starfað hjá fyrirtækinu frá árinu 2014 þegar hún hóf störf sem sumarstarfsmaður í flokkun á endurvinnsluhráefni. Síðan þá hefur hún gegnt fjölbreyttum hlutverkum innan félagsins, meðal annars á þjónustusviði og í reikningagerð, auk þess sem hún hefur síðustu ár starfað sem sérfræðingur á útflutnings- og hráefnasviði. Í þessum störfum hefur hún öðlast mikla þekkingu á rekstri félagsins og byggt upp sterkan grunn í fjármálum, ferlum og samskiptum við viðskiptavini og samstarfsaðila. Í nýju starfi mun Íshildur m.a. koma að rekstri og þróun fjármálasviðs, stýra umbótum á ferlum og verklagi og veita stuðning við áframhaldandi vöxt og þróun félagsins. Sjá einnig Andri Þór ráðinn sölustjóri Íslenska gámafélagsins Íshildur er með BS-gráðu í hagfræði frá Háskóla Íslands og hefur einnig lokið diplómanámi í opinberri stjórnsýslu. „Ég er afar spennt fyrir þessu nýja hlutverki og þeim tækifærum sem það felur í sér. Íslenska gámafélagið er að ganga í gegnum spennandi tíma og það er hvetjandi að fá að taka þátt í þeirri uppbyggingu og þróun sem fram undan er. Ég hlakka til að takast á við nýjar áskoranir með frábæru samstarfsfólki,“ segir Íshildur Agla.