Aftur og aftur reyndu börn og fullorðnir að tilkynna að ekki væri allt með felldu á sveitabænum Bakkakoti þar sem þau voru í vist. Árið 2002 viðurkenndi þáverandi húsfreyja á bænum, Þóra Bernódusdóttir, að hafa barið einn drengjanna – Svavar Þór Georgsson. Samt sendi Reykjavíkurborg börn í sumardvöl á bænum allt fram til ársins 2005 og samt var barn á vegum Kópavogsbæjar ekki tekið af bænum fyrr en tveimur mánuðum eftir ofbeldið. Nánar er fjallað um málið í fréttaskýringarþættinum Kveik í kvöld sem er á dagskrá klukkan 20:15. Þar stíga fleiri einstaklingar fram sem dvöldu í Bakkakoti sem börn. Tekið skal fram að Þóra býr ekki lengur í Bakkakoti og að ábúendur þar nú hafa ekkert með þetta mál að gera. Foreldrar uggandi en starfsfólk sannfærði þá Bjarki Heiðar Bjarnason er lögmaður 25 manna sem voru vistaðir í Bakkakoti sem drengir. Hann segir algjörlega óskiljanlegt að borgin hafi haldið áfram að senda börn í Bakkakot eftir að upp komst um ofbeldið gegn Svavari og eftir að fleiri börn höfðu sagt ofbeldi og áfengisdrykkju viðgangast á bænum. Hann segir að árið 2004 hafi foreldrar fengið á tilfinninguna að eitthvað misjafnt væri í gangi á bænum og haft samband við félagsmálayfirvöld. „Foreldrarnir eru í raun bara sannfærðir um að þetta sé allt í lagi: „Skiljiði bara börnin ykkar eftir, þetta verður allt í lagi.“ Foreldrarnir láta til leiðast og skilja börnin eftir í þessum aðstæðum,” segir Bjarki. Þetta fólk hefur þá ekki fengið að vita hvað hafi gengið á á undan, bæði ásakanirnar og ofbeldið sem þó kom þarna upp? „Ekkert slíkt, foreldrar fengu ekki að vita um eitt eða neitt. Börnin eru skilin þarna eftir. Maður spyr sig: Hverjir eiga að axla ábyrgð? Í sumum tilvikum eru starfsmenn sem fóru með þessi störf á þessum tíma og tóku þessar umræddu ákvarðanir enn þá við störf og eru komnir í yfirmannastöður,“ segir Bjarki. Nánar verður fjallað um málið í Kveik í kvöld og í ítarlegri veffærslu sem birtist klukkan 20:15.