Tvö grænlensk loðnuskip hafa verið að gera það gott á yfirstandandi loðnuvertíð en í brúnni á þeim báðum eru íslenskir skipstjórar. Þetta eru Polar Ammassak og Polar Amaroq sem bæði lönduðu í gær í Færeyjum. Sigurður Grétar Guðmundsson er skipstjóri á Polar Ammassak og Geir Zoëga á Polar Amaroq. Geir landaði í gær í Fuglafirði um 1.350 tonnum sem hann fékk út af Reykjanesi. Hrognafyllingin í þessari loðnu er 20-21%. Hann sagði ástæðuna fyrir því að landað væri í Færeyjum þá að allar vinnslur væru fullar á Íslandi og löndunarbið. Loðnan sem fékkst út af Reykjanesi var með 20-21% hrognafyllingu. FF MYND/JÓN STEINAR SÆMUNDSSON „Við vorum í einhverjum eftirhreytum við Reykjanesið. Það voru mun flottari torfur inni í Faxaflóa en það var ekki hægt að athafna sig þar út af veðri,“ segir Geir. Geir hafði spurnir af því að menn væru að veiða vel af loðnu núna við Ingólfshöfðann og greinilegt að loðna væri að koma upp að landi í spýjum. Þá er von á jafnvel sterkri vestangöngu og sögðu fiskifrettir.is frá því að Sigurður VE hefði verið við könnunarveiðar í Víkurál og fengið þar loðnu sem var mun skemmra gengin í hrognaþroska. Vilhelm Þorsteinsson EA kastaði við Hrollaugseyjar í byrjun viku og fékk þar loðnu sem var 15% gengin í hrognaþroska. Hnúfubakur. Mynd/Geir Zöega Geir segir að það fari eftir því hvað sé að koma upp af loðnu við suðausturlandið hvort ástæða gæti verið fyrir yfirvöld að auka kvótann. „En er ekki annars bara fínt að hafa þetta verkefni eins og það er. Ég hef ekki séð þessa göngu fyrir vestan en ég hef oft séð minna af loðnu.“ Hvalirnir raska lífríki hafsins Geir er þeirrar skoðunar að áhrif afráns hvala á loðnustofninn séu umtalsvert meiri en önnur umhverfisáhrif. „Ég fékk tvo hvali um daginn í nótina. Þetta var belja og kálfur sem syntu inn í nótina og voru þar í veislu. Beljan slapp fljótt en ég dældi bara úr nótinni meðfram síðunni meðan kálfurinn var þar. Geir Zoëga í brúnni á Polar Amaroq. Mynd/Guðlaugur B Birgisson Svo slökuðum við henni niður svo kálfurinn slapp. Hann fékk alla vega nóg að borða. Það eru hvalir út um allt og það er eitthvað sem menn þurfa að fara að skoða gaumgæfilega. Það er tímabært að fara að reikna út sjálfbærni hnúfubaksstofnsins og grisja hann vel. Hvalirnir eru að raska lífríkinu í hafinu, það er algjörlega borðleggjandi,“ segir Geir.