Verðbólga mældist áfram í hæstu gildum frá því í septem­ber 2024 í morgun en sam­kvæmt greiningu Bergþóru Baldurs­dóttur, hag­fræðings í greiningar­deild Ís­lands­banka, benda gögn til þess að verðbólguþrýstingur sé að aukast fremur en hjaðna. Verðbólgumælingin sem birtist í morgun er sú síðasta áður en Seðla­bankinn tekur næstu vaxtaákvörðun 18. mars en að mati greiningar­deildar Ís­lands­banka eru „sára­litlar líkur“ á vaxtalækkun í næsta mánuði. Vísi­tala neyslu­verðs (VNV) hækkaði um 0,94% í febrúar og ár­s­verðbólga stendur í stað í 5,2%. Verðbólga án húsnæðis stóð einnig í stað og mælist áfram 4,5%. Bergþóra segir mælinguna nokkuð yfir spá bankans, sem hafi gert ráð fyrir 0,7% hækkun vísitölunnar. Sam­kvæmt greiningu Ís­lands­banka skýrast hækkun VNV milli mánaða að stórum hluta af áhrifum útsölu­loka og ár­stíðar­bundinni hækkun flug­verðs. Flokkurinn hús­búnaður, heimilistæki og fl. hækkaði um 5,3% (0,21% áhrif á VNV) og segir Bergþóra að lækkun fyrri mánaða gangi þar í reynd til baka. Þá hækkaði fatnaður og skór um 5,1% (0,17% áhrif á VNV) og bendir hún á að þar sem flokkurinn lækkaði ríf­lega 7% í janúar sé lík­legt að áhrif útsölu­loka gangi að fullu til baka í mars. Flug­far­gjöld hækkuðu jafn­framt um 7,2% (0,17% áhrif á VNV). Þótt hækkunin sé að hluta ár­stíðar­bundin í kjölfar janúar­lækkunar, segir í greiningunni að hún hafi reynst meiri en búist var við og einnig meiri en oft gerist í febrúar. Mat­vörur koma á óvart Eitt sem kemur greiningu Ís­lands­banka á óvart er að mat­vöru­verð hækkaði meira en búist var við. Hækkunin nam 0,9% (0,14% áhrif á VNV) og virðist dreifast yfir marga flokka, þar sem hækkun var mest á græn­meti en einnig á sykri og sæ­tindum ásamt fleiri liðum. Bankinn bendir á að síðustu tvo mánuði hafi mat­vöru­verð hækkað sam­tals um 1,9%, sem sé „nokkuð áhyggju­efni“ og veki spurningar um hvort mat­vöru­hækkanir séu að taka við sér á ný. Á móti hafi húsnæðisliðurinn verið að mestu til friðs miðað við fyrri þróun. Flokkurinn hækkaði um 0,5% (0,15% áhrif á VNV), þar sem greidd húsa­leiga hækkaði um 1% og reiknuð húsa­leiga um 0,15%. Bergþóra nefnir sem jákvætt að áfram virðist hægja á hækkunum reiknaðrar húsa­leigu, sem vegur þungt í heildar­mælingunni. Elds­neyti lækkar Elds­neytis­verð lækkaði tals­vert milli mánaða, um 5,8% (-0,15% áhrif á VNV). Í greiningunni kemur fram að skýringin sé leiðrétting Hag­stofunnar vegna rangrar mælingar í janúar, og að áhrif af­náms vöru­gjalda á elds­neyti hafi því í reynd verið sterkari en janúar­mælingin gaf til kynna. Ís­lands­banki gerir ráð fyrir að ár­s­verðbólga fari tíma­bundið upp í mars, áður en hún lækkar aftur: Spá bankanst gerir ráð fyrir 0,6% hækkun VNV í marsmánuði og 5,4% ár­s­verðbólgu. Í spánni er gert ráð fyrir að útsölur gang að fullu til baka, flug­verð hækkar fyrir páska Þá er gert ráð fyrir 0,3% hækkun VNV og 4,8% ár­s­verðbólgu í apríl vegna minni hækkunar á flug­far­gjöldum vegna tíma­setningar páska Ár­s­verðbólga verður óbreytt síðan í 4,8% í maí sam­kkvæmt spá bankans. Bergþóra segir að verðbólga virðist nú þrálátari en áður var talið í ljósi nýjustu mælingar. Hún bendir jafn­framt á að þegar kjarna­vísitölur séu skoðaðar hafi kjarna­verðbólga hækkað á alla helstu mæli­kvarða milli mánaða, sem bendi til þess að undir­liggjandi verðbólguþrýstingur sé að aukast.