Bandaríski gagna­vers­risinn Equ­inix og kana­díski líf­eyris­sjóðurinn Canada Pension Plan Invest­ment Board (CPPIB) eru sögð vera að klára kaup á atNorth Holding AB, gagna­vers­rekanda í eigu sviss­neska fjár­festingarfélagsins Partners Group. atNorth er með höfuðstöðvar á Ís­landi og rekur gagna­ver á Ís­landi, í Dan­mörku, Svíþjóð og Finn­landi. Partners Group keypti atNorth í árs­lok 2021 og hefur félagið síðan stækkað hratt á Norður­löndum. Sam­kvæmt Bloom­berg er félagið metið á um 4 milljarða Bandaríkja­dala, að teknu til­liti til skulda, sem sam­svarar 485 milljörðum króna á gengi dagsins. Sam­kvæmt heimildum Bloom­berg er von á til­kynningu frá atNorth í þessari viku. atNorth er stærsta gagnaversfyrirtæki landsins og rekur gagnaver á Akureyri, í Reykjanesbæ og í Hafnarfirði. Félagið hefur stækkað hratt á undanförnum árum, bæði hér heima og ekki síður á hinum Norðurlöndunum, sem hefur kallað á miklar fjárfestingar. Samtals rekur atNorth átta gagnaver á Norðurlöndum og eru tvö til viðbótar í byggingu í Danmörku og Finnlandi. Starfsmenn félagsins eru rúmlega 200, þar af um helmingur á Íslandi. Þá hafa stjórnendur greint frá áformum um að reisa 300 megavatta gagnaver í grennd við Stokkhólm, sem stefnt er að því að opna í lok árs 2027.Þá stað­festi atNorth nýverið áform um 300 mega­vatta stór­verk­efni í Svíþjóð, sem undir­strikar hversu um­fangs­mikil fjár­festingaþörfin er þegar eftir­spurn eftir reikni­getu eykst, ekki síst vegna gervi­greindar. Digi­tal Realty einnig nefnt í hópi áhuga­samra Áður hefur verið greint frá því að Digi­tal Realty, annar bandarískur risi í gagna­vers­bransanum, hafi einnig verið meðal áhuga­samra kaup­enda í ferlinu. Heimildir Bloom­berg herma að þótt viðræður séu langt komnar geti samningar enn tafist. Tals­menn Equ­inix, CPPIB og Partners Group hafi ekki viljað tjá sig. Ef kaupin ganga eftir væri um að ræða einn stærsta yfir­töku­samning sem tengist ís­lenskri gagna­vers­starf­semi til þessa og nýtt dæmi um hvernig alþjóð­legt fjár­magn sækir í inn­viði sem tengjast gagna­vinnslu og gervi­greind, þar sem stærð, raf­orkuöryggi og stækkunar­mögu­leikar ráða miklu um verðmiða.