Útgerðarfélagið Brim hagnaðist um 60 milljónir evra, eða um 8,7 milljarða króna, á árinu 2025, samanborið við 40,5 milljóna evra hagnað árið áður. Hagnaður félagsins jókst því um 48% milli ára. Brim birti ársuppgjör eftir lokun Kauphallarinnar í dag. Stjórn félagsins leggur til arðgreiðslu að fjárhæð 4.043 milljónir króna vegna rekstrarársins 2025, eða sem nemur 2,1 krónu á hlut. Arðgreiðslan samsvarar 2,9% af markaðsvirði hlutafjár í lok árs 2025. Tekjur Brims jukust um 5,2% milli ára og námu 409,7 milljónum evra, eða um 59,3 milljörðum króna í fyrra. EBITDA-hagnaður félagsins jókst um 38,7% og nam 90,6 milljónum evra eða um 13,1 milljarði króna. „Rekstur Brims á árinu 2025 gekk vel,” segir Guðmundur Kristjánsson , forstjóri Brims. „Umtalsverður samdráttur var í veiðum á mikilvægum botnfisktegundum eins og þorski, ýsu og gullkarfa en afurðaverð á þorski, ýsu og ufsa voru mjög há og réð þar mestu minna framboð á mörkuðum vegna aflabrests í Barentshafi. Makrílveiðar gengu sérlega vel og þar voru há afurðaverð.” Hann segir að á árinu 2025 hafi komið í ljós eins og oft áður „að Brim sé traust og sterkt félag sem siglir áfram í gegnum öldur og brimskafla”. Eignir Brims námu samtals 146,8 milljörðum króna í árslok 2025, skuldir voru um 70,1 milljarður og eigið fé 76,7 milljarðar. Ákvarðanir stjórnvalda hafi mun meiri áhrif á framtíðarhorfur Guðmundur segir að þegar horft er um öxl til ársins 2025 í íslenskum sjávarútvegi beri hæst umrótið á vettvangi stjórnmálanna þar sem tekist var á um veiðgjöld og starfsskilyrði greinarinnar. „Sú ólga sem þar skapaðist hafði lítil áhrif á rekstur Brims en þeim mun meiri áhrif á framtíðarhorfur sem birtist m.a. í að við héldum að okkur höndum í fjárfestingum í framleiðslutækjum félagsins á Vopnafirði, Akranesi og í Reykjavík.” Sjá einnig Fæstir þing­menn skilji hvernig veiðigjöld eru reiknuð Hvað árið 2026 varðar þá líti það vel út með veiðar og afurðaverð. „Þegar hins vegar er horft til þeirra breytinga á lögum um veiðigjöld sem samþykkt voru á Alþingi á síðasta ári blasir við óvissa um hver veiðigjöld verða á hverja fisktegund á næstu árum því eins og sjá má á þessu ári þá hækkaði t.d. veiðigjald á makríl fyrir árið 2026 um 150% en lækkaði á síld um 60%. Einnig er mikil óvissa um þróun raforkuverðs á Íslandi í dag vegna mikilla hækkana á flutningskostnaði raforku. Þegar óvissa sem þessi ríkir í rekstrarumhverfi sjávarútvegs-fyrirtækja er eðlilegt að þau haldi að sér höndum við fjárfestingu í framleiðslutækjum og fari varlega við uppbyggingu vinnslu sjávarfangs hér á landi.“