Norðmenn fluttu út sjávarafurðir fyrir 14,8 milljarða NOK, tæplega 191 milljarð ÍSK, í janúar. Þetta er engu að síður samdráttur um 416 milljónir NOK, eða 3%, miðað við sama mánuð í fyrra. Þar munar mestu um mikinn samdrátt í sölu til Bandaríkjanna sem rekinn er til geðþóttaákvarðana í tollamálum og veiks dollars gagnvart norskri krónu. Í frétt frá Norska sjávarafurðaráðinu segir að rekja megi þetta til lægra verðs á laxi, veikari gengi bandaríkjadollars, minnkandi aflaheimildum á mörgum villtum fisktegundum og harðari samkeppni á mörkuðum sem eru Norðmönnum mikilvægir. Í janúar 2025 voru Bandaríkin stærsti einstaki markaður Norðmanna. Á einu ári hafa útflutningsverðmætin á þann markað dregist saman um 37%. Þrjú lönd hafa skriðið fram úr Bandaríkjunum sem stærstu einstöku markaðir Norðmanna, þ.e. Pólland, Holland og Kína. Óútreiknanleg tollastefna og veikur dollari gagnvart norsku krónunni hefur skapað norskum útflytjendum óvissu og áskoranir en Bandaríkin eru ennþá stærsti flakamarkaður Norðmanna í silungi og laxi. Mikilvægi þessa markaðar hefur komið niður á flakavinnslu í Noregi. Á síðasta ári stækkaði markaður fyrir flakaðan lax og silung um 8% en útflutningurinn féll niður um 9% í janúar miðað við sama mánuð í fyrra. 10 stærstu útflutningsmarkaðir Noregs Hér að neðan eru tíu stærstu útflutningsmarkaðir Noregs, verðmæti útflutningsins og breytingar í janúar miðað við janúar 2025. Pólland: NOK 1,9 milljarður (+55%) Kína: NOK 1,2 milljarður (+8%) Holland: NOK 943 milljónir (+8%) Bandaríkin: NOK 937 milljónir (-37%) Frakkland: NOK 913 milljónir (+1%) Bretland: NOK 849 milljónir (+2%) Spánn: NOK 820 milljónir (-4%) Danmörk: DKK 733 milljónir (-11%) Ítalía: NOK 635 milljónir (-19%) Suður-Kórea: NOK 432 milljónir (-21%) Aukin markaðshlutdeild í Evrópu Sala á evrópskum mörkuðum fyrir norskar sjávarafurðir fór úr 62% af framleiðslunni í janúar 2025 í 66% í janúar 2026. Mestur varð vöxturinn í Póllandi sem yfirleitt hefur verið talinn markaður fyrir áframvinnslu á fiski en nú horfir svo við að neysla Pólverja á laxi hefur vaxið mjög. Áhrif kvótasamdráttar í villtum fisk Aflaheimildir á fjölda tegunda villtra fiska hafa dregist enn frekar saman hjá Norðmönnum. Útflutningsverðmæti í janúar endurspegla þessa staðreynd í hærra verði og minnkandi framboði á makríl, ufsa og rækju. Leita þarf allt aftur til ársins 1990 til að finna minni útflutning á makríl frá Noregi og baráttan um hráefnið hefur aldrei verið harðari. Þetta hefur valdið landsvinnslunni í Noregi talsverðum erfiðleikum.