Fjár­mála­eftir­lit Seðla­banka Ís­lands hóf á árinu 2025 greiningu á 36 málum vegna meintra brota á lögum sem varða verðbréfa­markaðinn. Flest málanna, eða 15 talsins, vörðuðu meinta markaðsmis­notkun. Þá vörðuðu 12 mál meint inn­herja­svik, en fimm mál sneru að því hvort út­gef­endur hefðu fylgt reglum um birtingu inn­herja­upp­lýsinga. Auk þess hóf eftir­litið greiningu á tveimur málum vegna meintra brota gegn flöggunar­skyldu, sem og einu máli sem laut að skilum á skort­stöðu­til­kynningu og öðru þar sem til skoðunar var til­kynning stjórnanda um við­skipti með hluta­bréf. Af þeim málum sem hófust á árinu 2025 var 18 lokið innan ársins, en jafn­framt lauk 22 málum sem höfðu verið til með­ferðar frá fyrri árum. Líkt og áður lauk flestum málum án frekari að­gerða, alls 30 málum, en í einu til­viki var gerð at­huga­semd vegna brota á lögum. Fram kemur í ritinu Fjár­mála­eftir­lit sem kom út í gær að Fly Play hf. hafi gert sátt vegna þess að félagið birti ekki „eins fljótt og auðið var“ upp­lýsingar um minni tekjuöflun og að félagið yrði ekki rekið með jákvæðri rekstrar­af­komu (EBIT). Á árinu 2025 lauk Seðla­banki Ís­lands átta málum með sátt við málsaðila. Í sátt felst að málsaðili gengst við broti á ákvæðum laga, reglna eða ákvörðunum fjár­mála­eftir­litsins og upp­lýsir að fullu um brotið. Sátt getur jafn­framt verið bundin skil­yrðum, svo sem um greiðslu sektar í ríkis­sjóð og/eða að gripið sé til úr­bóta í samræmi við kröfur eftir­litsins. Gagnsæistil­kynningar vegna málanna hafa verið birtar á vef Seðla­bankans.