Hluta­bréf lax­eldis­félagsins Kald­víkur hafa lækkað veru­lega á First North-vaxtar­markaðinum á Ís­landi í dag. Hluta­bréfa­verð félagsins er komið niður í 63 krónur á hlut, sem jafn­gildir um 28% lækkun á einum degi. Við­skiptin voru þó afar rýr en gengið hefur lækkað í tveimur við­skiptum með 6.700 hluti, sem dregur fram hversu lítið flotið er hér heima. Á sama tíma lækkaði hlutabréfaverðið einnig í Noregi á Euronext Growth í Osló, þar sem síðasta viðskiptaverð var um 4,56 norskar krónur, sem jafngildir um 10% lækkun frá síðasta dagslokagengi. Þar var viðskiptavirkni meiri með hlutabréf félagsins en í Osló var lækkunin ekki jafn öfgakennd í prósentum og hér heima. Kjarni viðbragðanna virðist þó tengjast kauphallartilkynningu félagsins frá því á miðvikudag, þar sem félagið staðfestir að það hafi óskað eftir undanþágu frá ákveðnum skilmálum lánasamninga og að niðurstöðu sé vænst innan fyrsta ársfjórðungs. Þegar félag fer formlega í slíkt ferli lesa fjárfestar það gjarnan sem merki um aukna fjárhagslega spennu, jafnvel þó að viðræðurnar gangi „samkvæmt áætlun“. Slík undanþága er í grunninn beiðni til lán­veit­enda um að slaka tíma­bundið á lána­kvöðum eða breyta mæli­kvörðum, svo félagið teljist ekki brjóta samninga ef rekstrar­tölur eða lykil­hlut­föll þróast verr en gert var ráð fyrir. Félagið upp­lýsti jafn­framt að slátrað hafi verið 7.943 tonnum á fjórða árs­fjórðungi og sam­tals 17.105 tonnum á árinu 2025. Í kynningunni er farið nánar yfir að áskoranir tengdar svo­kallaðri G24-kynslóð hafi leitt til snemm­bærrar slátrunar. Þar er lýst að sár hafi byrjað að myndast á vaxtartíma­bili þegar hita­stig hækkaði og það hafi leitt til snemm­bærrar slátrunar. Kald­vík hafði áður, í lok janúar, varað við því að frá því upp­gjör þriðja árs­fjórðungs var kynnt í nóvember hefðu ýmsir þættir haft neikvæð áhrif á horfur fyrir fyrsta árs­fjórðung 2026, meðal annars snemm­bær slátrun og verðþróun á mörkuðum, og að hætta gæti verið á að félagið upp­fyllti ekki allar lána­kvaðir. Dagslækkunin virðist þó einkum vera bein viðbrögð við því að félagið stað­festi nú form­lega í upp­færslunni að beðið sé um undanþágu frá banka­skilmálum og að niður­stöðu sé vænst innan skamms. Sjá einnig Af­komu­viðvörun frá Kald­vík og gengið sígur