Héraðs­dómur í Lyng­by dæmdi í dag við­skipta­mann á áttræðis­aldri til átta mánaða skil­orðs­bundinnar fangelsis­vistar fyrir þátt­töku í hluta af stór­felldu fjár­festinga­svindli sem tengist veðmála­klúbbnum Optimizer. Málinu hefur verið lýst sem stærsta fjár­festinga­svindli gegn einka­aðilum í Dan­mörku hingað til. Alls lögðu 875 fjár­festar sam­tals um 900 milljónir danskra króna, rúm­lega 17 milljarða ís­lenskra króna, inn í „fjár­festinguna“ en þegar kerfið hrundi vantaði um 390 milljónir danskra króna. Maðurinn var sak­felldur fyrir að hafa, í hlut­verki sínu sem „klúbb­stjóri“ hjá Optimizer, látið hjá líða að grípa inn í þegar fimm félagar stóðu í því að leggja inn nýtt fé. Dómurinn taldi sannað að hann hefði þá haft nægi­lega skýra vit­neskju um að inn­borganirnar væru í veru­legri hættu, þar sem for­maður félagsins var þegar farinn að mis­nota fé fjár­festa. Sak­fellingin byggir þannig ekki á því að hann hafi sjálfur skipu­lagt svikin, heldur að hann hafi með að­gerðar­leysi sínu — þ.e. með því að vara ekki við og stöðva ekki inn­borganir sem hann kom að — stuðlað að því að fimm aðilar töpuðu sam­tals um 4,6 milljónum danskra króna. Dómurinn var átta mánaða fangelsi, en skil­orðs­bundinn, með því skil­yrði að hann leysi af hendi 150 klukku­stunda sam­félagsþjónustu Ákæru­valdið krafðist þriggja ára fangelsis Ákæru­valdið hafði krafist þess að við­skipta­maðurinn yrði dæmdur í þriggja ára óskil­orðs­bundið fangelsi en dómurinn féllst aðeins á lítinn hluta ákærunnar. Verjandi hans, Poul Hauch Fen­ger, til­kynnti í kjölfar dómsins að málinu yrði áfrýjað til Lands­réttar og sagði að skjól­stæðingur sinn hefði verið sýknaður af „95 pró­sentum“ ákæru­liða og að niður­staðan væri gjörólík því sem ákæru­valdið hefði haldið fram. Maðurinn hefur á meðan málið var rekið haldið fram sak­leysi sínu og lýst sér sem fórnar­lambi í málinu. Hann sagði í upp­hafi réttar­haldanna að fjöl­skylda hans hefði tapað um 20 milljónum danskra króna en í málinu kom fram af hálfu ákæru­valds að raun­veru­legt nettótap hefði verið minna þar sem hann og fjöl­skyldu­meðlimir hefðu fengið greiddar „ávöxtunar­greiðslur“ fram að hruni kerfisins. Í skrif­legri yfir­lýsingu eftir dóminn sagði hann að hann væri „fyrsti maður í heiminum til að vera dæmdur fyrir að stela af sjálfum sér“. „Klassískt pýramída­svindl“ Fjár­festarnir töldu sig vera að leggja fé í kerfi sem átti að byggja á veðmálum á íþrótta­viðburði og að „ávöxtunin“ kæmi í reynd gegnum veðmál á vefsíðu Bet­fair og væri ávöxtunin því skatt­frjáls. Í reynd var féð hins vegar ekki sett í veðmál á þann hátt sem haldið var fram. Að sögn ákæru­valds var hluti inn­borgana notaður til að greiða öðrum félögum út sem meinta ávöxtun, í anda þess sem jafnan er lýst sem pýramídavindli. Optimizer starfaði frá árinu 2011 þar til lögregla gerði hús­leitir og hand­tökur í janúar 2024. Aðal­gerandinn í málinu, Christian Han­sen (áður Christian Machholdt Østerga­ard), játaði í sér­stöku máli í desember 2024 svik upp á 928 milljónir danskra króna gegn 875 þo­l­endum og var dæmdur í fimm og hálfs árs fangelsi. Hinn aldraði viðskiptamaður var ákærður fyrir að hafa tekið þátt í svikum upp á 102,6 milljónir króna gegn 255 þo­l­endum á tíma­bilinu frá febrúar 2023 til janúar 2024. Ákæran laut meðal annars að því að hann hefði ekki brugðist við þegar hann fékk upp­lýsingar um að for­maðurinn hefði varið fé fjár­festa í ósamþykktar fjár­festingar, meðal annars í eðal­málma og fágæta steina. Dómurinn lagði hins vegar til grund­vallar að það hefði ekki verið fyrr en 6. október 2023 að vit­neskja við­skipta­mannsins um mis­notkun fjár­muna hefði verið nægi­lega skýr til þess að hann bæri ábyrgð á því að viðvaranir hefðu átt að koma fram. Dómurinn taldi að fyrri grunur, sem hann hefði kannað, gerði hann ekki sjálf­krafa að sam­verknaðar­manni – en að hann bæri ábyrgð í þeim til­vikum þar sem hann hefði að­stoðað við að afla nýrra inn­borgana eftir að vit­neskjan var orðin skýr. Bankar vöruðu við og skrúfuðu fyrir Í málinu kom jafn­framt fram að bankar hefðu ítrekað sent til­kynningar til peningaþvættis­skrif­stofu Dana um að Optimizer gæti verið pýramída­kerfi. Reksturinn lenti svo í veru­legum lausa­fjár­vanda þegar Nykredit stöðvaði við­skipta­vini frá því að senda eða taka við greiðslum tengdum Optimizer haustið 2023. Í dóms­málinu voru einnig rakin fölsuð gögn frá Bet­fair sem áttu að sýna háar inn­eignir á veðmála­reikningi en reyndust upp­spuni. Bet­fair hafði jafn­framt varað við því að fyrir­komu­lagið liti út eins og Ponzi-kerfi og við­skipta­maðurinn var gagn­rýndur fyrir að hafa ekki brugðist við þeim viðvörunum heldur haldið áfram að koma að því að afla nýrra inn­borgana.