Advise hefur lokið 166 milljóna króna hlutafjáraukningu til að styðja við innreið félagsins á Norðurlandamarkað. Fjármögnunin er hluti af um 400 milljóna króna fjármögnun félagsins á síðustu tveimur árum og var studd af núverandi hluthöfum. Fjárfestingin er leidd af Skyggni eignarhaldsfélagi, sem eykur við hlut sinn í félaginu í hlutafjáraukningunni. Samhliða tekur Ari Daníelsson, forstjóri Skyggnis, við sem stjórnarformaður Advise. Fyrirtækið mun á næstu vikum opna starfsstöð í Stokkhólmi og hefja sókn á markað sem er um 50 sinnum stærri en sá íslenski. Lausn félagsins, sem nýtir viðskipta- og gervigreind til að greina fjármál og styðja stjórnendur við ákvarðanatöku, hefur verið undirbúin fyrir skölun og tengist nú helstu bókhaldskerfum á Norðurlöndum. Sjá einnig Myndir: Morgun­verðar­fundur Advise „Við höfum byggt upp sterka stöðu á Íslandi á skömmum tíma og sjáum skýr tækifæri til vaxtar á Norðurlöndum þar sem áskoranir stjórnenda eru í grunninn þær sömu og á Íslandi. Við erum vel undirbúin og spennt að hefja næsta kafla félagsins,“ segir Mikael Arnarson, framkvæmdastjóri Advise. Yfir þúsund íslenskir stjórnendur nýta lausn Advise í dag, þar á meðal um 10% allra fyrirtækja með fleiri en 10 starfsmenn, en lausnin er samhæfð öllum helstu bókhaldskerfum á Íslandi, þar á meðal DK, Reglu, Payday og Microsoft Business Central. „Við hjá Skyggni höfum mikla trú á lausn Advise og teljum hana eiga skýrt erindi á alþjóðlega markaði. Félagið hefur þegar sannað sig á íslenskum markaði og byggt upp öflugt teymi með metnað til frekari vaxtar. Með aukinni fjárfestingu erum við að undirstrika þá trú í verki. Ég hlakka til að leiða stjórn félagsins og vinna náið með stjórnendum að því að móta stefnu og hraða vexti Advise,“ segir Ari Daníelsson, forstjóri Skyggnis og stjórnarformaður Advise.