Þrátt fyrir að dönsk hluta­bréf hafi valdið fjár­festum von­brigðum undan­farin ár telja tveir norrænir fjár­festar að enn leynist þar áhuga­verð tækifæri. Annar þeirra segir verðmat margra danskra félaga hafa lækkað það mikið að markaðurinn hljóti brátt að fara að meta þau að verð­leikum á ný, á meðan hinn sér sér­stakt svigrúm til mikillar hækkunar í einstökum félögum. Esben Sax­beck Larsen, sem stýrir hluta­bréfa­við­skiptum hjá Danske Bank Asset Mana­gement, segir dönsk hluta­bréf hafa verið „mestu von­brigðin“, ekki aðeins á þessu ári heldur undan­farin fimm ár. Danski markaðurinn hafi staðið nánast í stað á tíma­bilinu og dregist veru­lega aftur úr mörgum öðrum hluta­bréfa­mörkuðum á heims­vísu. Þrátt fyrir það segist hann sjá „fjölda mjög spennandi fjár­festingar­kosta“ á danska markaðnum. Að hans mati lítur verðmat danskra hluta­bréfa nú afar vel út eftir lækkanir síðustu ára og lík­legt sé að fjár­festar fari brátt að verð­leggja þau betur. Hann segir jafn­framt að í dag sé auðveldara að finna félög sem eigi að vera yfir­vigt í eignasöfnum en þau sem eigi að vera undir­vigt. Meðal stærstu fjár­festinga í danska hluta­bréfa­sjóðnum Danske Invest Dan­mark Fokus eru Vestas, NKT, Novo Nor­disk og AP Møller-Mærsk. Á sama tíma hefur Michael West Hyb­holt hjá Regulær Invest Nor­dic Shares minnkað stöðu sína í AP Møller-Mærsk og í staðinn tvöfaldað fjár­festingu sína í sænska fjar­skipta­félaginu Erics­son. Hann segir félagið höfða til sín þar sem reksturinn sé ekki eins sveiflu­kenndur og áður og félagið hafi auk þess orðið mun „hlut­hafa­vænna“. Michael West Hyb­holt hjá Regulær Invest Nor­dic Shares Hyb­holt segir einnig að ávöxtunar­möguleikar í hlutabréfum AP Møller-Mærsk hafi breyst eftir mikla hækkun hluta­bréfanna undan­farin ár. Félagið hafi skilað nærri 70 pró­senta heildarávöxtun á þremur árum, á meðan danska C25-vísi­talan hafi aðeins hækkað um 5,8 pró­sent. Þegar gengi félagsins fór að nálgast 18 þúsund danskar krónur á hlut hafi hann byrjað að minnka vægið í safninu. Maersk hafi þó reynst góður varnarkostur gegn pólitískri og landfræðilegri áhættu á mörkuðum. Öðru máli gegni hins vegar um skipafélagið DFDS. Hlutabréf félagsins hafa meira en helmingast á síðustu þremur árum, þótt þau hafi hækkað um tæp 12 prósent það sem af er þessu ári. Að sögn Hybholt hefur félagið glímt við þráláta samkeppni á Ítalíu–Tyrklandsleiðinni, þar sem ítalski keppinauturinn Grimaldi hafi sett verulegan þrýsting á afkomuna. Hann telur þó ólíklegt að sú staða haldist til lengdar. Ef samkeppnin linist og flutningamagn í Evrópu tekur við sér á ný gæti DFDS orðið meðal þeirra félaga sem hagnast mest á þeirri þróun. Til skemmri tíma litið muni hækkandi eldsneytiskostnaður þó áfram vega þungt á rekstrinum. Hyb­holt telur engu að síður að veru­legt fjárfestingartækifæri geti leynst í félaginu við réttar aðstæður. Að hans mati gæti hluta­bréfið hækkað um 50 til 100 pró­sent ef félagið fær meðvind. Hann bendir á að félagið sé nú verðlagt á mjög lágum marg­földurum; sam­kvæmt Bloom­berg séu fjár­festar aðeins að greiða 43 aura fyrir hverja krónu í bók­færðu eigin fé. Að mati Hyb­holt þarf því ekki mikið til að verðlagning félagsins taki jákvæða stefnu. Áhættan á lækkun sé tak­mörkuð, en upp­sveiflan geti orðið tals­verð ef rekstrar­skil­yrði batna. Hann leggur þó áherslu á að staðan í DFDS eigi ekki að vega þungt í eigna­safni. Í sjóðum félagsins nemur hún nú minna en tveimur pró­sentum.