Ótti fjár­festa við verðbólgu og staðnandi hag­vöxt með verðbólgu hefur aukist í kjölfar stríðsins við Íran, en vopna­hléð sem náðist í síðustu viku hefur breytt áhættu­myndinni að mati danskra markaðsaðila. Jakob Vejlø, fjár­festinga­stjóri hjá Bankin­vest í Dan­mörku, segir nú vera komið að því að auka aftur vægi hluta­bréfa í eignasöfnum á ný. „Margir fjár­festar hafa dregið úr hluta­bréfa­eign sinni og áhyggjur af alþjóða­hag­kerfinu hafa aukist. En undir­liggjandi þróun er farin að benda í rétta átt, þar á meðal á hluta­bréfa­markaði,“ segir Vejlø í sam­tali við Børsen. Hann segir Bankin­vest hafi farið aftur á kauphliðina á hluta­bréfa­markaði um miðja síðustu viku og hefur fært sig úr hlut­lausri stöðu yfir í yfir­vigt í hluta­bréfum. Sam­hliða því hefur sjóðurinn einnig aukið vægi í sveiflu­kenndari hluta markaðarins, meðal annars í vaxtar­fyrir­tækjum. Ástæðan er meðal annars sú að alþjóð­legir fjár­festar hafa orðið mun varfærnari frá því átökin við Íran hófust. Sam­kvæmt nýrri könnun Bank of America meðal alþjóð­legra sjóð­stjóra er viðhorfið það neikvæðasta frá því síðasta sumar. Fjár­festar hafa selt niður hluta­bréf og aukið hand­bært fé, um leið og væntingar til heims­hag­kerfisins hafa versnað veru­lega. Vejlø bendir þó á að sú neikvæða af­staða geti sjálf verið vís­bending um kaup­tækifæri. Að hans mati hafi mikil varnar­viðbrögð fjár­festa skapað aðstæður þar sem markaðurinn geti snúist hratt við ef óvissa minnkar. Viðhorf af svipuðum toga heyrast einnig frá Danske Bank. Sofi­e Manja Eger Huus, sér­fræðingur í markaðsmálum hjá bankanum, segir viðbrögð markaða eftir vopna­hléið benda til þess að stríðið við Íran hafi verið einn helsti óvissuþátturinn sem haldið hafi aftur af hluta­bréfum. Hún segir fjár­festa nánast „hrasa í átt að jákvæðari fréttum“ nú þegar tækifæri gefst til að horfa aftur til sterkra undir­liggjandi þátta á markaði, svo sem trausts hag­kerfis og horfa um áfram­haldandi hagnaðar­vöxt fyrir­tækja. Danske Bank hefur haldið í væga yfir­vigt í hluta­bréfum allan þann tíma sem átökin hafa staðið yfir í Miðaustur­löndum. Sú af­staða byggir á væntingum um að núverandi vopna­hlé geti þróast yfir í varan­legra sam­komu­lag. Ef það gerist telja markaðsaðilar að svigrúm sé fyrir tals­verða hækkun á mörkuðum, sér­stak­lega í þeim geirum sem hafa orðið hvað verst úti það sem af er ári. Bæði evrópskir bankar og iðn­fyrir­tæki eru nefnd í því sam­hengi, auk hug­búnaðar- og tækni­fyrir­tækja. Vejlø segir sér­stak­lega að veikasti hluti markaðarins það sem af er ári gæti tekið myndar­legan viðsnúning, að því gefnu að spennan í Miðaustur­löndum haldi áfram að minnka. Þrátt fyrir þessa bjartsýni leggja sér­fræðingarnir áherslu á að áhættan sé enn til staðar. Verði olíu­markaðurinn fyrir frekari áföllum eða ótti við staðnandi hag­vöxt og verðbólgu taki við sér á ný gæti myndin snúist hratt.