Alþjóð­legir fjár­festar hafa dælt met­fjár­hæðum í evrópsk hluta­bréf á undan­förnum vikum, knúnir áfram af vilja til að draga úr vægi Bandaríkjanna í eignasöfnum sínum og aukinni bjartsýni um efna­hags­horfur í Evrópu. Þetta kemur fram í um­fjöllun Financial Times, sem vísar til gagna frá EPFR um flæði í verðbréfa­sjóði og kaup­hallar­sjóði. Sam­kvæmt EPFR stefnir í mesta mánaðar­legt inn­flæði í evrópsk hluta­bréf frá því að mælingar hófust nú í febrúar. Tvær vikur í röð hafi flæði í sjóði numið um 10 milljörðum dala á viku, sem er met­viku­inn­flæði. Sam­hliða hefur Stoxx Europe 600 vísi­talan náð nýjum met­hæðum í mánuðinum, líkt og hluta­bréfa­vísitölur í Bret­landi, Frakk­landi og á Spáni. FT rekur þróunina meðal annars til þess að stórir fjár­festar vilji dreifa áhættu frá Wall Street, þar sem tækni­geirinn vegur þungt og um­ræðan um mögu­lega gervi­greindar­bólu hefur aukið óvissu. Sharon Bell, hluta­bréfa­greinandi hjá Gold­man Sachs, segir í viðtali við blaðið að um sé að ræða „marga alþjóð­lega fjár­festa sem vilji dreifa áhættu og haldi sig fjarri dýrum bandarískum markaði“, sér­stak­lega bandaríska fjár­festa sem leiti í auknum mæli út fyrir heima­markað. Hún bendir á að Evrópa bjóði upp á aðra sam­setningu, meðal annars minni áherslu á tækni. Evrópskir markaðir hafa einnig notið þess að for­ysta á hluta­bréfa­mörkuðum hefur að hluta færst frá gervi­greindar­risum yfir í geira sem vega þungt í Evrópu, svo sem banka og hrávöru­tengda starf­semi. FT nefnir að þessi til­færsla hafi stutt við bresku FTSE 100 vísitöluna, sem hafi hækkað um tæp 7% á árinu, og að einstök félög í „gamla hag­kerfinu“ hafi hækkað um­fram það. At­hygli vekur sam­kvæmt FT að hluti inn­flæðisins fer ekki endi­lega beint í sértæka Evrópu­sjóði, heldur í sjóði sem fylgja mörkuðum utan Bandaríkjanna al­mennt. Ástæðan sé sú að fjár­festar telji alþjóð­leg eignasöfn hafa orðið of þung í dýrum, gervi­greindar­tengdum bandarískum hluta­bréfum. Í þeirri þróun hafi fleiri markaðir en Evrópa farið fram úr Wall Street í ávöxtun það sem af er ári; FT bendir á að S&P 500 sé í 76. sæti af 92 stórum viðmiðum sem Bloom­berg fylgist með á árinu. Mikilvægur hluti rök­semdanna er verðlagning. Sam­kvæmt gögnum LSEG, sem FT vísar til, er Stoxx Europe 600 verðlagður á um 18,3 sinnum hagnað á meðan S&P 500 er á 27,7 sinnum hagnað. Það þýðir að fjár­festar telja sig sjá „ódýrari vasa“ og tækifæri í Evrópu, bæði hvað varðar geira og gjald­miðla. Efna­hags­horfur og stefna stjórn­valda spila einnig inn í. FT bendir á að sjóðir með áherslu á Evrópu hafi aftur farið að laða að sér fé á síðustu 12 mánuðum eftir ár af út­flæði, sam­hliða því að drungi í efna­hags­um­ræðu hafi dvínað. Þýska­land hafi til dæmis farið aftur í vöxt á síðasta ári í fyrsta sinn frá 2022 og ný­leg aukning í þýskum verk­smiðjupöntunum hafi styrkt trú fjár­festa á að um­fangs­miklar varnar- og fjár­festingaráætlanir séu farnar að skila sér inn í iðnað. Bank of America hafi í kjölfarið hækkað vægi þýskra hluta­bréfa í ráðgjöf sinni. Beata Mant­hey, hluta­bréfa­greinandi hjá Citi, segir sam­kvæmt FT að áhuginn hafi verið knúinn áfram af „fram­kvæmd inn­lendrar örvunar“ og til­færslu frá tækni­geiranum. Varnar­tengd hluta­bréf hafi haldið áfram að hækka, þar á meðal Rhein­metall í Þýska­landi og BAE Sy­stems í Bret­landi. Þrátt fyrir aukinn áhuga eru ekki allir sann­færðir um að Evrópa geti staðið undir sam­bæri­legum hagnaðar­vexti og Wall Street. FT vísar til Barcla­ys sem segir að bandarísk félög séu á leið í yfir 12% hagnaðar­vöxt milli ára á yfir­standandi upp­gjör­stíma­bili, á meðan Evrópa sé rétt undir 4%. Sumir fjár­festar kjósi því að velja sértæk félög frekar en að kaupa vísitölur í heild. Hani Redha, eignastýringaraðili hjá PineBrid­ge, segir sam­kvæmt FT að hann sé jákvæður gagn­vart áhrifum þýskrar örvunar — en leggi áherslu á mark­vissar stöður fremur en breiða kaup­hegðun á Evrópu­vísitölum.