Nokkur af stærstu skráðu félögum Dan­merkur hafa lækkað veru­lega í verði frá áramótum og telja sumir fjár­festar að þar kunni að leynast kaup­tækifæri. Sam­kvæmt um­fjöllun Børsen hafa sex félög í dönsku C25-úr­vals­vísitölunni fallið um meira en 20% frá áramótum. Það hefur orðið til þess að hluti markaðarins lítur svo á að verðmat sumra félaga sé orðið það lágt að erfitt sé að horfa fram hjá þeim. Meðal þeirra sem hafa nýtt lækkanirnar er Johnny Madsen, fjár­festinga­stjóri hjá eignastýringa­fyrir­tækinu Formu­e- & invester­ing­s­pleje. Hann segist ný­lega hafa keypt bréf í heyrnar­tækja­fram­leiðandanum Demant, sem hefur tapað um helmingi markaðsvirðis síns frá toppi ársins 2024. Að hans mati eru hluta­bréfin ein­fald­lega orðin of ódýr til að láta þau fram hjá sér fara. Hann segist vart muna eftir því að bréf félagsins hafi áður verið á jafn lágri verðlagningu. Ole Søeberg, fjárfestir og hlutabréfasérfræðingur hjá Brock Milton Capital, tekur í svipaðan streng. Hann segir að fjölmörg dönsk hlutabréf hafi lækkað svo mikið að verðið á þeim líti mjög vel út núna. Að hans mati er þróunin á danska markaðnum óvenju­leg. Hann bendir á að dönsk hluta­bréf hafi í heild staðið nær í stað í um fimm ár, sem sé ekki al­gengt á jafn sterkum markaði. Søeberg segir að ef litið sé fram hjá Novo Nor­disk og AP Møller-Mærsk, tveimur stærstu félögum danska markaðarins, séu félög í C25-vísitölunni að auka hagnað sinn um 9% á ári á sama tíma og þau séu verðlögð á um tífaldan rekstrar­hagnað, mælt með EV/EBIT-marg­faldara. Að hans mati bendir það til lágs verðmats. Hann nefnir sér­stak­lega að lækningatækni­fyrir­tækið Ambu sé komið á áhuga­vert verðbil. Þar sé um vaxtarfélag að ræða sem sé nú verðlagt á mun lægri marg­faldara en sést hafi lengi. Einnig segist hann hafa Colop­last, móðurfélag Kerecis, til skoðunar. Þótt sumir fjár­festar séu því farnir að kaupa inn á þessum lækkuðu verðum eru ekki allir til­búnir að hlaupa til. Børsen segir frá því að Søeberg bíði enn eftir stærri dýfu á markaði, á meðan aðrir hafi þegar ákveðið að nýta lækkanirnar. Á móti kemur að óvissan er enn tölu­verð. Í hlað­varpinu Børsen Investor bendir Søeberg á að ef átökin í Íran dragast á langinn geti núverandi lækkanir reynst aðeins upp­hafið. Að hans mati gætu hluta­bréf þá átt eftir að lækka um 20 til 25% til viðbótar, svipað og gerðist í leiðréttingunni árið 2022. Staðan endur­speglar því klofna sýn meðal fjár­festa. Annars vegar telja sumir að veru­legar lækkanir hafi fært ákveðin dönsk gæðafélög niður á aðlaðandi verðlag. Hins vegar óttast aðrir að ef alþjóð­leg spenna magnast frekar gæti markaðurinn lækkað enn meira.