Samningar Félags íslenskra atvinnuflugmanna við Icelandair hafa verið lausir í fimm mánuði. Samningaviðræður ganga afar hægt. Miðað við gang kjaraviðræðnanna í dag er afar ólíklegt að samningar verði undirritaðir áður en háannatími í ferðaþjónustu skellur á eftir mánuð. Sjá einnig Siglir Icelandair inn í háannatíma án kjara­samnings? Þó ríkisstjórnin komi ekki að kjaraviðræðum Icelandair gæti hún samt óbeint lagt sitt á vogarskálarnar. Er þá verið að vísa til ETS-kerfisins svokallaða, sem er viðskiptakerfi Evrópusambandsins með losunarheimildir. Þetta kerfi hefur skekkt samkeppni í flugi yfir Norður-Atlantshafið, því misjafnt er hvort og hversu mikið flugfélög greiða fyrir kolefniseiningar. Í ársuppgjöri Icelandair, sem birt var í byrjun febrúar, sést að félagið greiddi um 4,5 milljarða króna fyrir ETS-kolefniseiningar á síðasta ári. Á árinu 2024 nam þessi upphæð 2,8 milljörðum króna. Er þetta þrátt fyrir að íslenskum stjórnvöldum hafi verið heimilt að úthluta flugrekendum að hluta endurgjaldslausum hemilildum. Utanríkisráðherra skipaði í október starfshóp vegna endurskoðunar á ETS-kerfinu. Í ljósi þeirrar stöðu sem Ísland er í, eyja í Norður-Atlantshafi, sem er háð flug- og skipasamgöngum, ættu stjórnvöld eftir fremsta megni að reyna að ná sérsamningum um ETS-kerfið. Miklar launahækkanir Í byrjun febrúar birti Icelandair uppgjör fyrir árið 2025. Var 1,2 milljarða króna tap af rekstrinum í fyrra samanborið við 2,8 milljarða króna tap árið 2024. Á fjárfestakynningu sem haldin var í kjölfar uppgjörsins sagði Bogi Nils Bogason, forstjóri Icelandair, brýnt að endurskoða íslenska vinnumarkaðsmódelið. Á kynningunni var bent á að launavísitalan á Íslandi hefði hækkað um 49% frá árinu 2020. Til samanburðar hefðu launavísitölur í Bretlandi og Bandaríkjunum hækkað um ríflega 27% á sama tímabili og á evrusvæðinu og hinum Norðurlandaþjóðunum hefði hækkunin numið um 17%. Á fjárfestakynningunni var Bogi Nils spurður hvenær hann ætti von á að nýir kjarasamningar yrðu undirritaður og svaraði hann: „Við vitum öll að launahækkanir á Íslandi hafa verið mun hærri en í nágrannalöndum okkar á undanförnum árum. Það er mjög krefjandi fyrir útflutningsgreinar eins og við erum í. Við verðum að vinna saman að lausnum í þessum málum, fyrirtækið og stéttarfélögin – hagsmunir okkar fara saman. Fyrirtækið þarf að vera samkeppnishæft.“ Nánar er fjallað um málið í Viðskiptablaðinu . Áskrifendur geta lesið fréttina heild hér .