Hluta­bréf og skulda­bréf hafa lækkað tölu­vert í dag er áhyggjur aukast um að víðtækari átök á Mið-Austur­löndum gætu leitt til lang­varandi hækkunar á orku­verði. Sam­kvæmt Financial Times endur­spegla viðbrögðin að fjár­festar hafi dregið úr áhættutöku og farið að verð­leggja óhagstæðari sam­setningu hægari hag­vaxtar og þrálátari verðbólgu. Í Evrópu fór Stoxx Europe 600-vísi­talan niður um 3,2% í fyrstu við­skiptum á meðan þýska Dax-vísi­talan féll um 3,7% eftir 2,4% lækkun daginn áður. Verðbréfamiðlari í Kauphöllinni í New York í gær. © epa (epa) Í Bandaríkjunum benda fram­virkir samningar til þess að S&P 500 muni lækka um 1,7% og Nas­daq 100 um 2,2% þegar markaðir opna á eftir. „Þetta er ótti við samspil verðbólgu og hægari hagvaxtar,“ segir Emmanuel Cau, aðalgreinandi evrópskra hlutabréfa hjá Barclays, og bætti við að markaðurinn hefði áður verið of rólegur gagnvart umfangi átakanna. Olíu- og gas­verð knýr endur­mat Olíu­verð hélt áfram að hækka og fór verð á Brent-hráolíu, sem er alþjóð­legt viðmið, upp um 9% og yfir 85 dali á tunnu í morgun. Mun það vera hæsta staða olíu­verðs frá júlí 2024. Jafn­framt hækkaði evrópskt gas­verð enn frekar, um 45% til viðbótar, og hefur verið því tvöfaldast á viku. Sjá einnig Gas­verð rýkur upp eftir að Katar lokaði fram­leiðslu­stöð Financial Times tengir þessa þróun við það að átökin séu komin inn á fjórða dag og að olíu- og gas­flutningar frá svæðinu hafi dregist veru­lega saman þar sem skip forðast Hor­mússundið, lykil­siglinga­leið inn í Persaflóa. Þá hafi Íran ráðist á inn­viði á svæðinu í hefndarað­gerðum, meðal annars hafi varnar­málaráðu­neyti Katar sagt að Íran hefði beint árásum að gassvæði í Ras Laffan. Vaxtalækkanir ólíklegri vegna ástandsins Skulda­bréfa­markaðir brugðust einnig við. Ríkis­skulda­bréf lækkuðu í verði, einkum í Evrópu, þar sem hækkandi orku­verð ýtti undir að fjár­festar drógu úr væntingum um frekari vaxtalækkanir. Sam­kvæmt Financial Times var farið að verð­leggja um 30% líkur á því að Evrópski seðla­bankinn hækki vexti fyrir árs­lok, sem er um­snúningur frá því sem markaðir höfðu gert ráð fyrir fyrir átökin. Ávöxtunar­krafa á tveggja ára þýskum ríkis­bréfum hækkaði um 0,14 pró­sentu­stig í 2,22% og bættist þar við hækkun frá deginum áður. Í Bret­landi féllu væntingar um vaxtalækkun á næsta fundi Eng­lands­banka veru­lega, að því er fram kom í um­fjölluninni, og ávöxtunar­krafa á tveggja ára breskum ríkis­bréfum hækkaði um 0,18 pró­sentu­stig í 3,82%. „Fólk dregur úr áhættu,“ sagði Peter Schaffrik hjá RBC Capi­tal Markets og lýsti því að markaðurinn væri í raun að færa sig frá því að líta á átökin sem skamm­vinnt áfall yfir í að verð­leggja líkur á lengra stríði. Gull fellur með verðbréfum At­hygli vekur að verð á gullo, sem hækkar varnalega þeagar fjár­festar leita í öruggari eignir, hefur lækkaðum 4% í dag, samhliða lækkunum á verðbréfamörkuðum. Financial Times bendir á að slík hreyfing geti stafað af því að fjár­festar selji jafn­vel „öruggar“ eignir til að fjár­magna tap annars staðar eða mæta tryggingar­kröfum. Sam­kvæmt frásögn Financial Times felst kjarni málsins í því að hækkandi orku­verð er orðið megin­breyta í því hvernig markaðir meta bæði verðbólgu og vaxta­stig fram undan. Þegar orku­verð rís hratt verður erfiðara fyrir seðla­banka að lækka vexti án þess að auka verðbólguáhættu og það birtist strax í lækkun skulda­bréfa og endur­mati á vaxtalækkunar­ferlum.