„Gögnin sýna okkur að það eru fjórir nýjir einhverfir skjólstæðingar sem leita til samtakanna í hverjum mánuði. Sem gerir um það bil 15% nýrra skjólstæðinga,“ segir Thelma Smáradóttir, fagstjóri og sálfræðingur hjá Píeta. Hún segir líklegt að þetta hlutfall sé enn hærra þar sem ekki greini allir frá einhverfu. Hafa misst von um betri líðan Þetta er sex sinnum meira en hlutfall einhverfra á landsvísu, sem er um 2,6% samkvæmt nýlegri skýrslu félagsmálaráðuneytisins. Einhverft fólk sagðist í Kveik fyrr í vikunni lenda ítrekað á vegg í geðheilbrigðiskerfinu. „Fólk hefur misst von um betri líðan því þau eru að koma að lokuðum dyrum,“ segir Thelma. Spurð hvar fólkið komi að lokuðum dyrum segir hún það vera almennt í heilbrigðiskerfinu. Á þeirri forsendu að þau eru einhverf? „Við höfum dæmi um það, já hérna. Þegar við höfum sent tilvísun,“ segir Thelma. Ekki tekið við einhverfu fólki Hún segist hafa fengið þau svör, þegar hún sendi tilvísanir með beiðni um geðheilbrigðisþjónustu fyrir einhverfa skjólstæðinga að ekki sé tekið við einhverfu fólki. „Ég hef sjálf, sem sálfræðingur hjá Píeta, fengið neitun frá geðheilsuteyminu,“ segir Thelma og á þar við geðheilsuteymi heilsugæslu höfuðborgarsvæðisins. Forstjóri Heilsugæslu höfuðborgarsvæðisins sagði við fréttastofu í gær að þetta verklag hefði verið aflagt fyrir um hálfu ári og nú sé þar tekið á móti einhverfum. „Við höfum ekki orðið vör við það,“ segir Thelma spurð hvort Píeta-samtökin hafi orðið vör við þetta breytta verklag. „Við erum farin að senda minna til að valda ekki vonbrigðum.“ Er verið að mismuna einhverfum? „Persónulega finnst mér það, já. Mér finnst þetta ekki rétt.“ Missa von um betri líðan Hvaða áhrif hefur það á líðan fólks að koma ítrekað að lokuðum dyrum þegar það þarf á geðheilbrigðisþjónustu að halda? „Það hefur mjög slæm áhrif á líðan. Það er aðallega að missa þessa von um betri líðan.“