Eyjólfur Magnús Kristinsson, forstjóri atNorth, er í ítarlegu viðtali í nýjasta tölublaði þar sem að hann ræðir m.a. um 485 milljarða króna sölu á móðurfélagi gagnaversfyrirtækisins. Með síauknu vægi gervigreindar á alþjóðavísu mun þörfin á uppbygginu gagnavera halda áfram að aukast. Að sögn Eyjólfs má fyrst og fremst rekja hraðan vöxt síðustu ára til þess hve snemma fyrirtækið áttaði sig á þessari þörf. „Við áttuðum okkur á því að flest Evrópulönd voru að fara dragast langt á eftir í uppbyggingu stafrænna innviða vegna orkukrísunnar sem kom upp í álfunni eftir að Rússar réðust inn í Úkraínu. Það blasti við okkur að Norðurlöndin voru langbest í stakk búin til að ráðast í frekari gagnaverauppbyggingu. Markaðurinn í Evrópu hefur aðallega byggst upp í kringum fimm borgir: Frankfurt, London, París, Amsterdam og Dublin. Á næstu fimm árum er aftur á móti talið að 35-40% af heildarvexti gagnavera í Evrópu muni eiga sér stað á Norðurlöndunum. Á síðasta ári var um 60% af vexti gagnavera í Evrópu knúinn áfram af Norðurlöndunum. Það má því segja að við höfum veðjað á réttan hest með því að hafa snemma tryggt okkur land og aðgengi að raforku á nokkrum stöðum í Danmörku, Finnlandi og Svíþjóð til að byggja upp aukna þjónustugetu.“ Í ljósi þessa telur Eyjólfur mikla synd að ekki sé búið að skapa hentugri aðstæður fyrir frekari fjárfestingar í gagnaversiðnaðinum á Íslandi. „Ákveðin stjórnmálaöfl og fámennur, en hávær, hópur fólks finnur gagnaverum allt til foráttu og telur að gagnaverin séu að sóa stórum hluta orkunnar sem er framleidd í landinu, til dæmis í gröft eftir Bitcoin, sem er auðvitað alrangt,“ segir Eyjólfur og bendir á að orkunotkun atNorth hér á landi sé eins og er um 25 megavött og að heildarnotkun allra gagnavera landsins sé kannski um 70 megavött . Til að setja það í samhengi nemur heildarorkuframleiðsla á Íslandi um 2.400 megavöttum, eða 20 teravattstundum á ári. Þar að auki sé langstærsti hluti viðskiptavina gagnaveranna gervigreindar- eða skýjalausnafyrirtæki. Umræða um að gagnaver skapi fá sem engin störf er að sögn Eyjólfs einnig á misskilningi byggð. „Besta dæmið um þetta eru jákvæð áhrif gagnaversins á Akureyri fyrir nærsamfélagið. Eitt af okkar helstu markmiðum er að eiga gott samband við nærsamfélögin við gagnaverin okkar, til dæmis með því að leita með verkefni til verktaka á svæðinu eins og kostur er á. Það að fáir eða enginn starfi í gagnaverunum sjálfum er alrangt og við þurfum á mjög sérhæfðu starfsfólki að halda, sem fær vel greitt fyrir störf sín. Þá má ekki gleyma að gagnaver þurfa nær stöðugt á margs konar þjónustu verktaka að halda. Það tekur nokkuð langan tíma að byggja heilt gagnaver og þegar byggingu þess er lokið er yfirleitt komið að því að endurbyggja fyrsta fasa gagnaversins. Við erum búin að vera með starfsemi á Akureyri í um þrjú ár og starfsmannafjöldinn, að verktökum meðtöldum, hefur aldrei farið undir 100 og er búinn að vera um 150 síðasta árið. Það er ekkert útlit fyrir að þessi umsvif minnki fyrr en við getum ekki lengur vaxið meira á svæðinu.“ Nánar ef fjallað um málið í Viðskiptablaðinu . Áskrifendur geta lesið viðtalið í heild hér .