Vogunar­sjóðurinn Caxton Associa­tes hefur tapað að minnsta kosti yfir 600 milljónum dala í markaðs­sveiflum sem hafa fylgt stríðsátökunum í Miðaustur­löndum, sam­kvæmt heimildum Financial Times. Helsti sjóður félagsins, 9 milljarða dala sjóður sem byggir á veðmálum um efna­hags­þróun (svo­kallaður global macro sjóður), lækkaði um 7% í síðustu viku og er ávöxtun ársins nú neikvæð um 1%. Í um­fjöllun blaðsins kemur fram að sjóðir félagsins hafi orðið fyrir bak­slagi þegar orku­verð og vextir sveifluðust skarpt í kjölfar árása Bandaríkjanna og Ís­raels á Íran og gagnárása sem leiddu til þess að siglingar um Hor­mússund stöðnuðu að miklu leyti. Olíu­verð fór tíma­bundið yfir 100 dali á tunnu og sveiflur urðu miklar á skulda­bréfa­mörkuðum sem hefur reynst mörgum sjóðum erfiður jarðvegur, sér­stak­lega þeim sem hafa verið stað­settir fyrir lækkandi vexti. Markaðir hafa sam­hliða þessu verðlagt að seðla­bankar á borð við Eng­lands­banka og Seðla­banka Evrópu gætu neyðst til að fresta vaxtalækkunum eða jafn­vel hækkað vexti ef orku­skotið leiðir til þrálátari verðbólgu. Bret­land varð verst úti í skulda­bréfaútsölunni sem fylgdi í kjölfarið og Financial Times bendir á að það vegi þungt fyrir Caxton í ljósi þess að for­stjóri sjóðsins, Andrew Law, hafi áður verið bjartsýnn á bresk ríkis­bréf og talið að vextir þar væru rang­lega verðlagðir. Caxton svaraði ekki beiðni blaðsins um at­huga­semd. Í sömu um­fjöllun kemur fram að annar þekktur sjóður af svipuðum toga, Tudor Invest­ment Cor­por­ation í eigu Paul Tudor Jones, hafi tapað 1,8% en sé þó enn 0,9% í plús frá áramótum. Viðmæ­lendur blaðsins lýsa því að víða hafi sjóðir þurft að loka tap­stöðum í þröngum og sveiflu­kenndum markaði og að fátt hafi „virkað“ nema að draga úr skuld­setningu.