Fimmtungi starfs­manna fisk­vinnslunnar Erik The Red Sea­food í Kefla­vík hefur verið sagt upp vegna minna fram­boðs af hráefni og hækkunar á fisk­verði, að sögn Ketils Helga­sonar, eig­anda fyrir­tækisins. Hann segir í sam­tali við Fiskifréttir Við­skipta­blaðsins upp­sagnirnar nema um tuttugu manns og að draga hafi þurft saman seglin þar sem „ekki er grund­völlur fyrir því að halda áfram með sumt af því sem við vorum að gera“. Ketill tengir stöðuna meðal annars við það að út­flutningur á óunnum fiski haldi áfram að aukast á sama tíma og hráefni til inn­lendrar vinnslu er af skornum skammti. Hann segir að hann hafi um ára­bil bent á að tryggja þurfi betur að fiskur sé ekki fluttur út óunninn í svo stórum stíl, en að lítið hafi gerst í málinu. Hanna Katrín Friðriks­son at­vinnu­vegaráðherra hafi í nóvember sagt í Fiskifréttum að málið væri til skoðunar í ráðu­neytinu en Ketill segist ekki hafa heyrt frekar af fram­haldinu. Á sama tíma hefur Jens Garðar Helga­son, vara­for­maður Sjálf­stæðis­flokksins, boðað þingsá­lyktunar­tillögu um vöru­merkja­vernd fyrir ís­lenskan bol­fisk og varað við að „stjórn­laus“ út­flutningur á óunnum fiski geti grafið undan ímyndinni þegar hráefnið er unnið er­lendis og selt sem ferskur ís­lenskur fiskur. Ketill bendir einnig á að aðstæður á mörkuðum hafi verið krefjandi, meðal annars vegna hækkandi verðlags, veikrar dollarastöðu og 10% tolla á inn­flutning til Bandaríkjanna. Hann segir að fyrir verslanir vestan­hafs hafi þetta í sumum til­vikum þýtt 40–80% verðhækkun eftir vöru­flokkum, en að ekki hafi alltaf verið hægt að velta hækkununum að fullu út í smásölu­verð.