Stjórnarformaður Icelandair segir algjört forgangsverkefni að koma flugfélaginu aftur í arðbæran rekstur og að hluthafar uppskeri eftir krefjandi ár í rekstri. Á aðalfundi Icelandair í dag benti Guðmundur Hafsteinsson, stjórnarformaður Icelandair, á að þrátt fyrir að félagið hafi náð met tekjum árið 2025 hafi EBIT-afkoman verið neikvæð og félagið skilaði tapi. „Það er ekki ásættanlegt og því þurfum við að breyta.“ „Síðustu ár hafa verið krefjandi og afkoma félagsins ekki ásættanleg. Það er sannarlega kominn tími til að hluthafar uppskeri og tala ég þá bæði sem stjórnarformaður og hluthafi sjálfur. Miðað við hvernig staðan hefur verið, er skiljanlegt að hluthafar séu orðnir óþreyjufullir,“ sagði Guðmundur. „Ég tel hins vegar að nú sé komið að ákveðnum vendipunkti. Sú vinna sem staðið hefur yfir síðustu ár er að byrja að skila sér og tel ég að félagið sé betur í stakk búið til að takast á við framtíðina en nokkru sinni fyrr. Á næsta aðalfundi vil ég að ekki sé aðeins rætt um met í rekstri, heldur einnig um arðbæra niðurstöðu.“ Sjá einnig Icelandair tapaði 1,2 milljörðum í fyrra Guðmundur, sem hefur setið í stjórn Icelandair frá árinu 2018 og gegnt stjórnarformennsku frá árinu 2021, sagði að afkoma félagsins í fyrra hafi ekki verið í takt við væntingar stjórnarinnar í upphafi síðasta árs. Félagið hafi þó ekki setið auðum höndum. Hann sagði undirliggjandi rekstur hafa styrkst, miklar breytingar hafi verið gerðar á mörgum sviðum starfseminnar og árangurinn í helstu rekstrarþáttum sem félagið hefur stjórn á hafi verið framúrskarandi að hans mati. Í þessu samhengi benti hann á að félagið flutti yfir 5 milljónir farþega á árinu, sætanýting var 83,5% og stundvísi rétt tæplega 84%. Umbreyta félaginu út frá öllum hliðum rekstrarins Guðmundur sagði að í kjölfar Covid-faraldursins hafi stjórn Icelandair sett þrjú verkefni í forgang, „ná betri tökum á kostnaði, standa okkur í vaxandi samkeppni og bæta afkomu af fraktstarfseminni”. Félagið hafi náð góðum árangri í tveimur af þremur þáttum. Ósjálfbær samkeppni á Keflavíkurflugvelli hafi kostaði Icelandair og hluthafa þess, og vísaði þar í samkeppni við Play. Það þekkist varla neins staðar í heiminum að tvö tengiflugfélög starfi frá sömu tengimiðstöð, sérstaklega ekki á jafn litlum markaði og Ísland er. „En nú eru tækifæri í stöðunni ef rétt er haldið á spilunum og er staða Icelandair á Keflavíkurflugvelli nú mjög sterk.“ Hann sagði að það hafi tekist að snúa rekstri fraktstarfseminnar við eftir mikinn taprekstur árið 2023. Hvað varðar kostnað sagði hann að eitt af lykilmarkmiðum félagsins sé að gera það samkeppnishæft í öllum kostnaðarliðum. Hann benti á að umbótaverkefni sem eru hluti af ONE-herferðinni muni skila yfir 100 milljóna dala ávinningi á ári þegar þær verða að fullu komnar til framkvæmda. „Við fengum erlenda ráðgjafa tímabundið með okkur í þetta verkefni og hefur það gengið vonum framar. Í upphafi var áherslan fyrst og fremst á kostnað en fljótlega hófum við að horfa á að umbreyta félaginu út frá öllum hliðum rekstrarins.” Guðmundur sagði hins vegar krefjandi rekstrarumhverfi hafa gert félaginu erfitt fyrir og nefndi þar veikingu Bandaríkjadals, miklar launahækkanir á íslenska vinnumarkaðnum og aukin umhverfistengdan kostnað. „Þessir þættir sem ég hef nefnt gerðu það að verkum að ávinningurinn af aðgerðum félagsins til að bæta afkomuna kom ekki nægjanlega vel fram í rekstrarniðurstöðu ársins. Áfram eru óvissuþættir í umhverfinu sem við þurfum að fylgjast með og má þar helst nefna átökin fyrir botni Miðjarðarhafs. Hins vegar erum við svo sannarlega búin að styrkja félagið og erum hvergi nærri hætt.“