Hluta­bréfa­verð Icelandair lækkaði um 6% í kaup­höllinni í dag en líkt og Við­skipta­blaðið greindi frá í morgun ákvað norræna flug­félagið SAS að segja upp sam­starfs­samningi við Icelandair og tekur upp­sögnin gildi í lok þessa mánaðar. Félögin hafa átt í sam­starfi frá árinu 2010. Sam­starfið hefur einkum snúið að sam­kenndum flugum (e. code share) og gagn­kvæmum réttindum fyrir vildar­klúbbs­félaga. Þegar sam­starfið var kynnt á sínum tíma sagði fram­kvæmda­stjóri hjá SAS að sam­komu­lagið tryggði þægi­legri tengingar og hagstæðari far­gjöld milli Ís­lands og Evrópu í gegnum tengimiðstöðvar SAS í Kaup­manna­höfn og Stokk­hólmi. Tals­kona SAS segir við danska flug­miðilinn Checkin að flug­félagið hafi ákveðið að segja upp samningnum þar sem það sé að auka eigin flug­um­ferð milli Kaup­manna­hafnar og Kefla­víkur. Í frétt FF7 er bent á að breytingin fylgi í kjölfar þess að Air France-KLM Group flug­sam­stæðan eignaðist 60% hlut í SAS. Þá stefni norræna flug­félagið að því að sækja fram í flugi til Norður-Ameríku og auka þar með við sam­keppni við Icelandair. Gengi Sýnar lækkaði síðan um tæp 4% í lítilli veltu en hluta­bréfa­verð fjar­skipta- og fjölmiðla­fyrir­tækisins hefur verið á miklu skriði eftir að greint var frá því að Sýn væri að selja Símanum alla vef- og út­varps­miðla félagsins. Þrátt fyrir lækkun dagsins hefur gengi Sýnar hækkað um 21% síðastliðinn mánuð. Þá gaf gengi Ocu­lis ör­lítið eftir og lækkaði um 2,5% í lítilli veltu. Dagsloka­gengi Ocu­lis var 3.250 krónur á hlut. Úr­vals­vísi­talan OMXI15 lækkaði um 1% og lokaði í 2.726 stigum. Heildar­velta í kaup­höllinni nam 1,4 milljörðum.