Hluta­bréfa­verð Icelandair hefur lækkað um tæp 8% í fyrstu við­skiptum í morgun en ætla má að lækkunin sé til­komin vegna hækkunar á olíu­verði. Heims­markaðsverð á olíu hækkaði skarpt í morgun, á fyrsta við­skipta­degi eftir loftárásir Bandaríkjanna og Ís­raels á Íran um helgina. Verð á Brent-hráolíu, sem er alþjóð­legt viðmiðunar­verð á olíu og er notað í flug­véla­elds­neyti, hækkaði um 13% í fyrstu við­skiptum í morgun og fór hæst í 82,37 dali á tunnu í upp­hafi dags. Gengi Icelandair stendur í 0,70 krónum þegar þetta er skrifað og er því markaðsvirði félagsins komið undir 30 milljarða. Snorri Jakobs­son, eig­andi greiningar­fyrir­tækisins Jakobs­son Capi­tal, sagði í viðtali í Morgun­blaðinu um miðjan febrúar að upp­lausnar­virði Icelandair numið um 50 milljörðum króna og því gæti skapast yfir­töku­hætta. Í kjölfarið tók gengi flugfélagsins smá kipp en sú hækkun hefur gengið til baka. Gengi Icelandair hefur lækkað um 19% á árinu og 43% síðastliðið ár.