Gengi hluta­bréfa Icelandair hefur lækkað um tæp 6% í fyrstu við­skiptum í morgun. Hluta­bréfa­verð félagsins hefur þannig gefið eftir tæp­lega helming af hækkun föstu­dagsins þegar fjár­festar bundu vonir við að spennu í Miðaustur­löndum færi að slota og friðar­sam­komu­lag væri í augsýn. Hluta­bréf félagsins opnuðu í 0,86 krónum í morgun, eftir að hafa lokað í 0,918 krónum á föstu­dag. Á föstu­dag hækkaði gengi bréfanna hins vegar skarpt, úr 0,807 krónum í 0,918 krónur, eða um tæp 14% á einum degi. Með þeirri hækkun nam hækkun bréfanna um rúm 26% síðastliðinn mánuð. Lækkunin í morgun kemur á sama tíma og fjár­festar endur­meta áhættu eftir að vonir um friðar­sam­komu­lag, sem kviknuðu á föstu­dag, virðast hafa dofnað. Olíu­verð hækkaði snögg­lega í fyrstu við­skiptum í morgun eftir að Íran hótaði gagn­ráðstöfunum vegna hald­lagningar Bandaríkja­manna á írönsku flutninga­skipi. Sú þróun vegur gjarnan þungt fyrir flug­félög, þar sem hækkandi olíu­verð getur þrýst upp elds­neytis­kostnaði og þar með veikt af­komu­horfur. Sam­hliða þessu var einnig neikvæðari tónn á evrópskum hluta­bréfa­mörkuðum í morgun, þar sem fjár­festar færðust aftur í varnar­stöðu í ljósi vaxandi óvissu um fram­hald átakanna og mögu­legar friðar­viðræður. Sjá einnig Olíu­verð hækkar og evrópsk hlutabréf á niðurleið