Gengi Icelandair hefur hækkað um rúm 5% það sem af er degi en í morgun bárust fregnir af því að Bandaríkin og Íran væru nálægt sam­komu­lagi sem gæti dregið úr spennu í Mið-Austur­löndum og opnað á eðli­legri flutninga um Hor­mússund. Verðið á Brent-hráolíu hefur lækkað um tæp 9% og stendur í um 100 dölum þegar þetta er skrifað en tunnan stóð í 125 dölum fyrir örfáum dögum. Gengi Icelandair byrjaði daginn í 0,79 krónum á hlut og voru fyrstu og stærstu við­skipti dagsins til­kynnt við opnun með um 23,1 milljón hluti á því gengi sem sam­svarar um 18,2 milljón króna við­skiptum. Heildar­velta þegar þetta er skrifað er 83 milljónir króna og stendur gengið í 0,808 krónum. Sjá einnig Olíu­verð hrynur vegna vonar um sam­komu­lag Þrátt fyrir tölu­verðar sveiflur á olíu­markaði hefur gengi Icelandair hækkað um 1,6% síðastliðinn mánuð. Í kaup­hallar­til­kynningu Icelandair í morgun var greint frá því að flug­félagið flutti 402 þúsund farþega í apríl, sem er 5% fjölgun frá sama mánuði í fyrra. Af farþegum mánaðarins voru 28% á leið til Ís­lands, 20% frá Ís­landi, 46% tengi­farþegar og 6% ferðuðust innan­lands. Þá greindi Bogi Nils Boga­son, for­stjóri Icelandair, frá því að í ljósi átaka í Mið-Austur­löndum og snarpra hækkana á elds­neytis­verði hafi félagið gripið til mót­vægisað­gerða. Þær felist meðal annars í áfram­haldandi kostnaðaraðhaldi, hækkun far­gjalda og 2% sam­drætti í flug­fram­boði á öðrum árs­fjórðungi, eins og áður hafi verið til­kynnt. Hann sagði einnig að frekari aðlögun á flugáætlun væri til skoðunar. Þar á meðal sé mögu­leg ákvörðun um að flýta út­fösun Boeing 757-véla, sem eru ekki jafn spar­neytnar og nýrri flug­véla­tegundir. Sjá einnig Farþegum Icelandair fjölgaði um 5% í apríl