Úr­vals­vísi­talan OMXI15 lækkaði um tæp 1,7 pró­sent í dag og stóð í 2.688,32 stigum við lokun. Seðla­banki Ís­lands hækkaði vexti í morgun og svo virðist sem vaxta­hækkunin hafi slegið á bjartsýni ís­lenskra fjár­festa en lækkanir dagsins voru víðtækar og náðu flestra félaga á markaðnum. Eim­skip leiddi lækkanir dagsins. Bréf félagsins féllu um tæp 4,5 pró­sent og lokuðu í 248 krónum. Við­skipti með bréfin námu um 30 milljónum króna. Hluta­bréf málm­leitarfélagsins Amaroq Minerals lækkuðu næst­mest, eða um tæp 3,5 pró­sent, og enduðu í 168 krónum. Velta með bréf félagsins nam um 47 milljónum króna. Þá lækkuðu bréf Skaga einnig um tæp 3,5 pró­sent og lokuðu í 17 krónum en hafa ber í huga að það er arðs­leysis­dagur hjá Skaga í dag. Hluta­bréfa­verð Beru, áður Öl­gerðin, féll um rúm 3,2 pró­sent og var dagsloka­gengi 14,7 krónur. Velta nam um 59 milljónum króna. Reitir lækkuðu sömu­leiðis um rúm 3,2 pró­sent og lokuðu í 120 krónum, en þar nam velta um 205 milljónum króna. Sýn lækkaði um tæp 3 pró­sent í 103 krónur, en við­skipti með bréf félagsins námu um 8 milljónum króna. Bréf Sjóvár féllu um tæp 2,6 pró­sent í 37,8 krónur, í um 75 milljóna króna veltu. Festi var meðal veltu­hæstu félaga dagsins. Bréf félagsins lækkuðu um tæp 2,2 pró­sent og lokuðu í 312 krónum en velta nam um 339 milljónum króna. Kaldalón lækkaði jafn­framt um tæp 2,2 pró­sent í 26,8 krónur, í um 55 milljóna króna við­skiptum. Bréf JBT Marel lækkuðu um tæp 2,1 pró­sent og enduðu í 16.300 krónum. Velta með bréfin nam um 9 milljónum króna. Heimar lækkuðu um tæp 2 pró­sent í 35,6 krónur, í um 55 milljóna króna veltu. Bréf Kviku lækkuðu um tæp 1,8 pró­sent og lokuðu í 17,9 krónum, í um 254 milljóna króna við­skiptum. Arion banki lækkaði um 1,6 pró­sent í 185 krónur, í um 308 milljóna króna veltu. Hampiðjan féll um tæp 1,6 pró­sent í 94,5 krónur, í um 22 milljóna króna við­skiptum, og bréf Símans lækkuðu um tæp 1,5 pró­sent og enduðu í 12,9 krónum.