Gengi krónunnar hefur verið til­tölu­lega stöðugt undan­farin misseri þrátt fyrir við­skipta­halla og áföll í út­flutnings­greinum. Krónan veiktist um rúm 2% gagn­vart evru á síðasta ári en styrktist um rúm 10% gagn­vart Bandaríkja­dal. Eftir viðsnúning í október og veikingu fram í desember tók síðan við hæg­fara styrking, þótt gengið gæfi eftir tíma­bundið í lok febrúar þegar fjár­festar leituðu í öryggi vegna aukinnar alþjóðapólitískrar áhættu. Sam­hliða þessari þróun hefur hrein fram­virk gjald­eyris­staða við­skipta­bankanna tekið að hækka á ný. Um er að ræða stöðu bankanna í af­leiðu­samningum, svo sem fram­virkum gjald­miðla­samningum og gjald­miðla­skipta­samningum, sem fela í sér við­skipti milli krónu og er­lendra gjald­miðla. Hækkun slíkrar stöðu bendir al­mennt til þess að meira sé um samninga þar sem aðilar vilja annaðhvort festa gengi fram í tímann eða taka stöðu milli krónu og er­lendra gjald­miðla í gegnum banka­kerfið. Í ritinu segir að þessi þróun endur­spegli meðal annars að inn­lend fyrir­tæki og fjár­festar hafi í auknum mæli notað fram­virka samninga til að verja sig gegn styrkingu krónunnar. Slík vörn getur skipt máli fyrir aðila með tekjur eða eignir í er­lendum gjald­miðlum, þar sem styrking krónunnar lækkar virði þeirra mælt í krónum. Eftir­spurn eftir slíkum samningum jókst sér­stak­lega eftir snarpa gengis­veikingu krónunnar í október. Jafn­framt hafi er­lend fjár­mála­fyrir­tæki, eða við­skipta­vinir þeirra, í auknum mæli gert gjald­miðla­skipta­samninga við inn­lendu bankana undan­farin misseri. Sjá einnig Minni fram­virk staða gæti styrkt krónuna í sumar Þá juku er­lend fjár­mála­fyrir­tæki einnig kaup sín á krónum frá inn­lendum við­skipta­bönkum á síðasta ári. Hrein kaup þeirra námu um 100 milljörðum króna og tvöfölduðust milli ára. Á sama tíma jukust krónu­inn­stæður er­lendra aðila um 26 milljarða króna. Þetta bendir til þess að áhugi er­lendra aðila á krónum hafi aukist í gegnum af­leiðu­við­skipti og aðrar skammtímastöður, þótt hrein fjár­festing þeirra í inn­lendum verðbréfum hafi verið tak­mörkuð í fyrra. Sjá einnig Ferðamenn hafa meiri áhrif á krónuna en áður