Úr­vals­vísi­talan OMXI15 hækkaði um 0,65 pró­sent í dag og endaði í 2.682 stigum, eftir að alþjóð­leg markaðsviðhorf héldu áfram að batna í kjölfar vopna­hlés­fregna frá Miðaustur­löndum. Er­lendis ein­kenndust markaðir af sambærilegri þróun sem lýsa má sem varfærinni bjartsýni Hér heima var hækkunin nokkuð breið. Hluta­bréfa­verð Símans hækkaði um tæp 4% á meðan Al­vot­ech hækkaði um 2,5%. Gengi Icelandair hækkaði um rúm 2% líkt og gengi Eikar. Þá hækkaði gengi Hampiðjunnar, Sjóvá, Eim­skips og Ís­lands­banka um rúmt 1%. Heildarvelta á markaði nam 2,8 milljörðum króna. Þróunin rímar að nokkru leyti við það sem sást á er­lendum mörkuðum. Á mið­viku­dag hrundi olíu­verð og hluta­bréfa­markaðir hækkuðu víða eftir að Donald Trump boðaði tíma­bundið vopna­hlé við Íran. Í dag voru markaðir enn jákvæðir, en hækkunin var mun hóf­legri þar sem fjár­festar biðu frekari skýr­leika um hvort vopna­hléið myndi halda og hvort samningar um Hor­mússund skiluðu varan­legri niður­stöðu.