Við­skipti voru óvenju­dauf í Kaup­höll Ís­lands í dag og heildar­velta nam aðeins um 1,4 milljörðum króna. Á sama tíma hækkaði olíu­verð skarpt á er­lendum mörkuðum og evrópsk hluta­bréf lækkuðu í kjölfar vaxandi spennu í Miðaustur­löndum. Fjár­festar héldu að sér höndum í Kaup­höll Ís­lands í dag og fátt benti til þess að mikill áhugi væri á nýjum stöðutökum. Heildar­velta á aðalmarkaði nam aðeins um 1,4 milljörðum króna í 196 við­skiptum, sem verður að teljast fremur lítið miðað við venju­legan dag á markaði. Úr­vals­vísi­talan OMXI15 lækkaði um 0,31% og endaði í 2.673,70 stigum. Mesta hækkun dagsins var hjá Kaldalóni er gengið fór upp um 1,3% í 41 milljón króna veltu. Á móti lækkaði Amaroq Minerals mest, eða um 2,48%, þá Ocu­lis um 1,78% og Iceland Sea­food um 1,69%. Við­skiptin voru mest í Ís­lands­banka, þar sem velta nam um 654 milljónum króna. Gengi bankans hækkaði um minna en 1% í viðskiptunum. Þar á eftir komu Festi með um 137 milljóna veltu og Arion banki með um 124 milljónir. Þrátt fyrir það var heildar­myndin sú að markaðurinn var daufur og lítið líf í stórum hluta félaga á listanum. Dauf stemning hér heima var í takti við varfærni á er­lendum mörkuðum. Olíu­verð rauk aftur yfir 100 dali eftir að spennan í Miðaustur­löndum jókst enn frekar. Brent-hráolía fór í um 102 dali og bandaríska WTI-olían fór í rúm­lega 103 dali. Hækkun olíu­verðs setti mark sitt á hluta­bréfa­markaði í Evrópu. Sam­evrópska Stoxx 600-vísi­talan lækkaði um 0,8%, DAX í Frankfurt um 1% og CAC 40 í París um 1%, en FTSE 100 í London stóð betur vegna hækkana í olíu- og orkufélögum og var niður um 0,55%.