Skagi hf. tapaði 336 milljónum króna eftir skatta á fyrsta árs­fjórðungi ársins, saman­borið við 1,4 milljarða króna tap á sama tíma­bili í fyrra. Tap af grunn­rekstri nam 81 milljón króna, saman­borið við 284 milljónir króna á fyrsta árs­fjórðungi í fyrra. Hagnaður á hlut var neikvæður um 0,18 krónur og arð­semi eigin fjár var neikvæð um 5,7% á árs­grund­velli. Haraldur I. Þórðar­son, for­stjóri Skaga, segir reksturinn hafa gengið ágæt­lega á fjórðungnum. „Rekstur sam­stæðunnar gekk ágæt­lega á fyrsta árs­fjórðungi þessa árs. Tekjur og af­koma af grunn­rekstri jukust hvort tveggja milli ára og af­koma grunn­rekstrar var um­fram áætlun á tíma­bilinu,“ segir Haraldur. Hann segir jákvæða af­komu trygginga­rekstrar hafa staðið upp úr á fjórðungnum, enda sé fyrsti árs­fjórðungur jafnan þungur vegna ár­stíðar­bundins tjónaþunga. Besta trygginga­af­koma frá 2018 Tekjur af vá­tryggingar­samningum jukust um 6,9% á milli ára og námu rúmum átta milljörðum króna. Af­koma trygginga­rekstrar var jákvæð um 138 milljónir króna, saman­borið við 51 milljónar króna tap á sama tíma­bili í fyrra. Sam­sett hlut­fall var 98,3%, saman­borið við 100,7% á fyrsta fjórðungi í fyrra. Sam­kvæmt fjár­festa­kynningu Skaga er þetta besta sam­setta hlut­fall félagsins á fyrsta árs­fjórðungi frá árinu 2018. „Af­koma af trygginga­starf­semi hélt áfram að aukast og var sam­sett hlut­fall fyrsta árs­fjórðungs það lægsta síðan 2018. Af­koma trygginga á fjórðungnum var í heild mjög sterk, þrátt fyrir að veður­far og nokkur stærri tjón í mars hafi haft neikvæð áhrif,“ segir Haraldur. Iðgjöld í líf- og sjúk­dóma­tryggingum jukust um 11,2% á fyrsta fjórðungi. Haraldur segir það endur­spegla áherslu félagsins á vöxt í þeim greina­flokki. Þá hafi sam­starf VÍS og Ís­lands­banka áfram skilað góðum árangri og góður taktur verið í sölu vá­trygginga. Fjár­mála­starf­semin undir væntingum Hreinar tekjur af fjár­mála­starf­semi námu 714 milljónum króna á fjórðungnum, saman­borið við 780 milljónir króna á sama tíma í fyrra. Það jafn­gildir tæp­lega 9% sam­drætti á milli ára. Af­koma fjár­mála­starf­semi var neikvæð um 20 milljónir króna fyrir skatta en hafði verið neikvæð um 34 milljónir króna á fyrsta árs­fjórðungi í fyrra. Af­koman batnaði því lítil­lega þrátt fyrir lægri tekjur. Haraldur segir frávik frá áætlun hjá Fossum einkum skýrast af lægri tekjum af fyrir­tækjaráðgjöf og því að lækkanir á mörkuðum undir lok fjórðungsins hafi haft neikvæð áhrif á fjár­muna­tekjur bankans. Vaxta­munur Fossa nam 152 milljónum króna á tíma­bilinu og var sá mesti frá upp­hafi, sam­kvæmt Haraldi. Af­koma Fossa var jákvæð um þrjár milljónir króna fyrir skatta. Tekjur Ís­lenskra verðbréfa námu 225 milljónum króna á fyrsta fjórðungi og jukust um 14% frá fyrra ári. Af­koma félagsins var þó neikvæð vegna kostnaðar við starfs­lok í tengslum við fækkun starfs­fólks. Eignir í stýringu hjá félaginu námu 227 milljörðum króna í lok tíma­bilsins, en eignir í stýringu hjá sam­stæðunni allri námu 251 milljarði króna. Fjár­festingar undir mark­miðum Fjár­festingar­tekjur Skaga námu 366 milljónum króna á fyrsta árs­fjórðungi, sem jafn­gildir 0,7% ávöxtun. Til saman­burðar lækkaði viðmiðunar­vísi­tala safnsins um 0,8% á tíma­bilinu. Af­koma fjár­festinga var því um­fram viðmiðunar­vísitölu en undir langtíma­mark­miðum félagsins. Í fjár­festa­kynningu kemur fram að veik hluta­bréfa­markaðsþróun hafi haft neikvæð áhrif á fjár­festinga­tekjur, en skráð hluta­bréf höfðu neikvæð áhrif sem námu 336 milljónum króna á fjórðungnum. „Af­koma fjár­festinga var ágæt í ljósi markaðsaðstæðna en dregið hafði verið nokkuð úr vægi skráðra hluta­bréfa í lok síðasta árs sem og upp­hafi þessa árs,“ segir Haraldur. Hann segir alla eigna­flokka hafa skilað af­komu um­fram viðmið, að undan­skildum ríkis­skulda­bréfum. Mest hafi af­koman verið af öðrum skulda­bréfum, skráðum og óskráðum skulda­bréfum fyrir­tækja, eða rúm­lega 501 milljón króna. Fjár­festinga­safn trygginga­rekstrarins nam 50,9 milljörðum króna í lok mars. Vægi skráðra hluta­bréfa var lækkað á fjórðungnum en vægi fyrir­tækja­skulda­bréfa aukið. Stefna að 180 milljóna kostnaðar­lækkun Í kjölfar þess að sam­runa­viðræðum Skaga og Ís­lands­banka var slitið hefur stjórn Skaga farið yfir stefnu sam­stæðunnar. Félagið hyggst ein­falda stjórn­skipu­lag og ná fram auknu hag­ræði í rekstri. Stein­grímur Arnar Finns­son mun láta af störfum sem for­stjóri Fossa og Brynjar Þór Hreins­son tekur við. Stein­grímur mun áfram gegna ráðgjafar­hlut­verki fyrir félagið á næstu misserum. Sjá einnig For­stjóra­skipti hjá Fossum og hag­ræðing hjá Skaga Sam­hliða verður starf­semi móðurfélagsins ein­földuð. Ekki verður ráðið í starf fjár­mála­stjóra sam­stæðu í stað Brynjars. Skagi áætlar að til­færsla verk­efna, hag­ræðing og ein­földun á starf­semi móðurfélags geti skilað allt að 180 milljónum króna í ár­lega lækkun kostnaðar á sam­stæðu­grunni þegar að­gerðirnar eru að fullu komnar til fram­kvæmda. „Í gær til­kynntum við um upp­færðar áherslur í kjölfar stefnurýni sem miða að því að auka arð­semi eftir um­breytingar síðustu ára með að­gerðum í átt að ein­faldara stjórn­skipu­lagi og auknu hag­ræði af rekstri sam­stæðunnar,“ segir Haraldur. Heildar­eignir Skaga námu 87,2 milljörðum króna í lok mars og eigið fé 22,7 milljörðum króna. Gjaldþols­hlut­fall sam­stæðunnar var 1,27 í lok fjórðungsins og eigin­fjár­hlut­fall Fossa var 22,6%.