Verðbólga á evru­svæðinu hækkaði í 3% í apríl, sam­kvæmt bráða­birgðatölum sem birtar voru í dag. Muna þegar vera hækkun úr 2,6% í mars en sam­kvæmt Financial Times reyndist hækkunin meiri en hag­fræðingar höfðu gert ráð fyrir. Grein­endur höfðu að jafnaði spáð því að verðbólgan myndi mælast 2,9% en þetta mun vera annar mánuðurinn í röð sem verðbólga á evru­svæðinu er yfir 2% mark­miði Seðla­banka Evrópu. Hækkunin kemur á sama tíma og evrópskt hag­kerfi finnur fyrir áhrifum mikillar hækkunar orku­verðs í kjölfar átakanna í Mið-Austur­löndum. Verð á Brent-hráolíu hækkaði í dag um allt að 7% og fór í 126 dali á tunnu, sem er hæsta verð frá því stríð Bandaríkjanna og Írans hófst í febrúar. Áhyggjur fjár­festa beinast einkum að mögu­legri röskun á orkuút­flutningi um Hor­mússund, eina mikilvægustu flutnings­leið heims fyrir olíu og gas. Hag­vöxtur hægir á sér Sam­hliða verðbólgutölunum var greint frá því að hag­vöxtur á evru­svæðinu hefði aðeins numið 0,1% á fyrsta árs­fjórðungi. Hag­kerfið óx um 0,2% á fjórða árs­fjórðungi síðasta árs og höfðu grein­endur búist við að vöxturinn héldist óbreyttur. Hærra orku­verð hefur þannig þegar farið að bíta í efna­hags­um­svif á svæðinu. Dýrari orka eykur kostnað fyrir­tækja og heimila, þrýstir upp verðlagi og getur dregið úr neyslu og fjár­festingu. Diego Is­caro, hag­fræðingur hjá S&P Global Market Intelli­gence, segir að lands­lagið hafi breyst hratt eftir að átökin í Mið-Austur­löndum hófust. Hærri verðbólga og aukin óvissa hafi aukið veru­lega líkur á sam­drætti. Skulda­bréfa­markaðir undir þrýstingi Hækkun olíu­verðs og nýjustu verðbólgutölur settu þrýsting á evrópska skulda­bréfa- og hluta­bréfa­markaði í morgun. Ávöxtunar­krafa tíu ára þýskra ríkis­skulda­bréfa fór hæst í 3,13% í morgun, sem er hæsta gildi frá árinu 2011, áður en hún gaf lítil­lega eftir. Krafa á tíu ára bresk ríkis­skulda­bréf var í kringum 5,1% og nálægt hæstu gildum frá árinu 2008. Stoxx Europe 600 hluta­bréfa­vísi­talan lækkaði lítil­lega í við­skiptum dagsins. Þróunin endur­speglar vaxandi áhyggjur markaða af því að orku­verðs­skotið geti orðið þrálátara en áður var talið og haldið verðbólgu ofar mark­miðum seðla­banka lengur. Seðla­bankar bíða átekta Verðbólgutölurnar birtast á viðkvæmum tíma fyrir peninga­stefnuna í Evrópu en bæði Seðla­banki Evrópu og Eng­lands­banki birta vaxtaákvarðanir í dag. Búist er við að báðir seðla­bankarnir haldi vöxtum óbreyttum, enda vilja stjórn­endur þeirra fá meiri tíma til að meta hvort hækkun orku­verðs þróist yfir í víðtækari verðbólguþrýsting. Fyrir Seðla­banka Evrópu flækir staðan sér­stak­lega myndina. Hag­vöxtur er veikur, en verðbólga er aftur farin að hækka og er komin vel yfir mark­mið. Það dregur úr svigrúmi bankans til að lækka vexti eða gefa skýr merki um slökun peninga­stefnunnar. Niður­staðan er að evru­svæðið stendur nú frammi fyrir óþægi­legri blöndu hægari vaxtar og þrálátari verðbólgu. Orkuá­fallið frá Mið-Austur­löndum hefur þannig á skömmum tíma breytt væntingum á mörkuðum og gert vaxta­horfur í Evrópu óvissari.