Fjár­festar vænta þess að ís­lenski hluta­bréfa­markaðurinn hækki á næstu mánuðum, sam­kvæmt nýrri viðhorfskönnun Akkurs meðal markaðsaðila. Könnunin var lögð fyrir dagana 28. til 30. apríl og sýnir skýra bjartsýni á þróun OMXI15-vísitölunnar, bæði til sex og tólf mánaða. Svo­nefnt bull-bear spread mældist jákvætt um 39,6 pró­sentu­stig til næstu sex mánaða og 71,7 pró­sentu­stig til næstu tólf mánaða. Með því er átt við muninn á hlut­falli þeirra sem vænta hækkana og þeirra sem vænta lækkana. Í ein­földu máli þýðir jákvætt bull-bear spread að fleiri fjár­festar eru „bolar“ en „birnir“. Bola­markaður vísar til hækkandi markaðar og bjartsýni fjár­festa, en bjarnar­markaður til lækkandi markaðar og svartsýni. Meiri bjartsýni þegar horft er lengra fram Til næstu sex mánaða gera 51% svar­enda ráð fyrir hækkun OMXI15-vísitölunnar. Þar af telja 45,3% að vísi­talan hækki um 1 til 10% og 5,7% að hækkunin verði meiri en 10%. Um 37,7% búast við að markaðurinn verði nokkurn veginn óbreyttur, en 11,3% vænta lækkunar. Bjartsýnin eykst veru­lega þegar horft er til tólf mánaða. Þá gera 82,1% svar­enda ráð fyrir hækkun hluta­bréfa. Þar af vænta 27,4% meira en 10% hækkunar og 54,7% hækkunar á bilinu 1 til 10%. Aðeins 10,4% svar­enda vænta lækkunar á tólf mánaða tíma­bili og enginn svarandi gerir ráð fyrir meira en 10% lækkun. Það bendir til þess að markaðsaðilar líti frekar á núverandi stöðu sem tíma­bundið óvissutíma­bil en upp­haf á lang­varandi lækkunar­skeiði. Sjá einnig Oculis helsta vonarstjarnan Meiri­hluti telur markaðinn undir­verðlagðan Könnun Akkurs sýnir einnig að mikill meiri­hluti fjár­festa telur ís­lenska hluta­bréfa­markaðinn undir­verðlagðan. Um 61,3% svar­enda telja markaðinn undir­verðlagðan um 5 til 20% og 20,8% telja hann veru­lega undir­verðlagðan, eða um meira en 20%. Sam­tals telja því rúm­lega 82% svar­enda markaðinn undir­verðlagðan. Aðeins 2,8% telja markaðinn yfir­verðlagðan og enginn telur hann veru­lega yfir­verðlagðan. Um 14,2% telja markaðinn nokkurn veginn rétt verðlagðan. Þetta styður þá ályktun að væntingar um hækkun hluta­bréfa byggist ekki aðeins á al­mennri bjartsýni heldur einnig á mati fjár­festa á því að verðlagning félaga sé hagstæð. Vextir gætu enn hækkað til skemmri tíma Þrátt fyrir bjartsýni á hluta­bréfa­markaðinn telja fjár­festar að vaxta­stigið verði áfram áskorun. Um 67% svar­enda gera ráð fyrir að stýri­vextir verði hærri eftir sex mánuði. Um 31,1% telja þá verða óbreytta og aðeins 1,9% vænta lægri vaxta á því tíma­bili. Myndin breytist hins vegar þegar horft er til tólf mánaða. Þá gera 45,3% ráð fyrir hærri vöxtum, 17% óbreyttum vöxtum og 37,7% lægri vöxtum. Þetta bendir til þess að markaðsaðilar telji Seðla­bankann hug­san­lega þurfa að herða peninga­stefnuna til skemmri tíma en að auknar líkur séu á vaxtalækkunum þegar lengra líður á tíma­bilið. Fjár­festar virðast einnig gera ráð fyrir að verðbólga fari að hjaðna þegar lengra líður á árið. Til sex mánaða telja 24,5% svar­enda að verðbólga verði hærri, 36,8% að hún verði óbreytt og 37,7% að hún verði lægri. Til tólf mánaða eru væntingarnar mun skýrari. Þá gera 72,6% svar­enda ráð fyrir að verðbólga verði lægri, 18,9% telja hana óbreytta og aðeins 8,5% vænta hærri verðbólgu. Þetta er mikilvægt í sam­hengi við bjartsýnina á hluta­bréfa­markaðinn. Ef verðbólga hjaðnar á sama tíma og vaxtalækkunar­væntingar aukast gæti það stutt við hærra verðmat hluta­bréfa, sér­stak­lega félaga sem eru næm fyrir vaxta­stigi og neyslu. Verðbólga og vextir stærsta áhættan Þrátt fyrir jákvæða sýn á hluta­bréfa­markaðinn nefna fjár­festar verðbólgu og vexti sem stærstu áhættuna. Rúm­lega helmingur svar­enda, eða 50,9%, telur verðbólgu og vexti vera stærsta áhættuþáttinn. Þar á eftir kemur hætta á hnattrænum efna­hags­sam­drætti, sem 26,4% nefna. Inn­lend pólitísk áhætta er nefnd af 12,3%, raun­gengi krónunnar af 5,7% og aðrir þættir af 4,7%. Niður­staðan er því nokkuð tvíbent: fjár­festar eru bjartsýnir á ís­lensk hluta­bréf og telja markaðinn undir­verðlagðan, en sú bjartsýni hvílir að miklu leyti á því að verðbólga hjaðni og vaxta­horfur batni þegar líður á árið. Ef verðbólga reynist þrálátari eða vextir hækka meira en markaðurinn gerir ráð fyrir gæti sú for­senda veikst.