Verði ekki af Fjarðarheiðargöngum gæti þurft að ráðast í kostnaðarsamar endurbætur á veginum yfir heiðina ef hann ætti að uppfylla kröfur um stofnvegi í vegaskrá. Samkvæmt minnisblaði Vegagerðarinnar gætu þær gætu kostað allt að 9,5 milljarða króna. Erfiðir dagar á heiðinni undanfarið og vegurinn illsýnilegur á köflum Yfir Fjarðarheiði fóru í fyrra 678 bílar á dag að jafnaði og spá gerir ráð fyrir að eftir fimm ár verði meðalumferðin komin í um 1100 bíla á dag. Þetta er fjallvegur með kröppum og bröttum beygjum, bæði Egilsstaðamegin og þar sem ekið er niður í Seyðisfjörð. Uppi á háheiðinni er líka langur og erfiður kafli, um 10 kílómetrar í mikilli hæð. Þar er veðravíti og stundum hríð þótt blíða sé niðri í byggð. Þó að heiðin teljist fær er stundum svo blint að bílstjórar þurfa að fikra sig á milli stika og þannig voru aðstæður á heiðinnni fyrr í vikunni þegar hún lokaðist um tíma. Nú er staðan þannig að margar vegstikur eru horfnar. Moksturstækin hafa lent á stikum eða kastað þungum snjónum á þær og brotið. Vegagerðin segir Fjarðarheiði erfiða í vetrarþjónustu og starfsmenn voru á heiðinni í gær með málmleitartæki. Þeir voru að kraka sig niður á fæturna sem stikurnar eru festar í svo hægt væri að endurnýja stikurnar. En vegurinn þykir líka óöruggur á sólbjörtum sumardögum, mjór og skemmdur. Nú þegar til stendur að blása af göng undir Fjarðarheiði sem áður voru næst á áætlun hefur Vegagerðin að beiðni innviðaráðherra tekið saman hvað kosti að lagfæra veginn til framtíðar þannig að hann uppfylli kröfur og viðmið í vegaskrá. Austurfrétt sagði fyrst frá minnisblaðinu. Langdýrast að breikka veginn sem er tveimur metrum of mjór Bráðustu öryggisaðgerðir myndu kosta hálfan milljarð, að setja niður vegrið, lagfæra öryggissvæði og fleira. Vegurinn er líka missiginn með hjólförum, kantskemmdum, burðarlag lélegt og slitlagið líka. Endurbætur á því myndu kosta 1,5-2 milljarða. Dýrasta vandamálið er hve vegurinn er mjór, aðeins sjö metrar og jafnvel mjórri en ætti að vera níu metra breiður. Breikkun myndi kosta 6-7 milljarða en hægt væri að spara tvo milljarða í þeirri framkvæmd með því breikka veginn aðeins um einn metra en ekki tvo. Samtals myndu endurbæturnar kosta gróflega á bilinu 6-9,5 milljarða, samkvæmt minnisblaði Vegagerðarinnar. Þá er ótalinn kostnaður við að minnka bratta í brekkum sem mögulega gæti kallað á tilfærslu veglínu.