Fisktækniskóli Íslands og Háskólinn á Hólum í Hjaltadal í samstarfi við Háskólann á Akureyri bjóða upp á yfirgripsmikið nám í fiskeldisfræðum. Það getur boðið nemendum upp á diplómu í þessum fræðum en þeir sem fara alla leið geta orðið sér úti um meistaragráðu. Fisktækniskóli Íslands hefur boðið upp á nám í fiskeldisfræðum allt frá árinu 2016. Þar eru að jafnaði 10-15 nemendur sem hefja nám á vor- og haustönn ár hvert. Klemenz Sæmundsson skólastjóri segir mikla þörf fyrir nám af þessu tagi því fiskeldi og lagareldi séu greinar sem vaxi stöðugt og sjái ekki fyrir endann á þeim vexti. Klemenz segir að boðið sé upp á nám á framhaldsskólastigi í fiskeldi í Fisktækniskólanum. Námið er uppbyggt miðað við óskir Háskólans á Hólum og kröfum greinarinnar. Klemenz Sæmundsson, skipstjóri Fisktækniskóla Íslands. Námið er til þriggja ára. Fyrstu tvö árin eru almennt nám í bóknámsgreinum og síðasta árið er öll áherslan á fiskeldisfög. Kennd er líffærafræði fiska, fóðrun fiska, haf- og veðurfræði, vatns- og umhverfisfræði, öryggi á vinnustað, sjúkdómavarnir og velferð eldisfiska, HACCP-gæðakerfi og uppsetning og viðhald. Nemendur þurfa einnig að hafa lokið verklegu námi sem er 30 einingar. Á þriðja ári býður Fisktækniskólinn einnig upp á gæðastjórnunarnám. Margir sem vinna við fiskeldi hafa sótt það nám. Námið hentar nemendum sem koma úr öllum greinum matvælaiðnaðarins. Langflestir nemenda eru við störf í greininni sem er hin íslenska leið. Þessu er öfugt farið í Noregi þar sem flestir hefja störf í greininni að loknu sambærilegu námi. Nemendum Fisktækniskólans sem hafa unnið í greininni stendur til boða raunfærnimat og fengið þannig einingar metnar inn á þriðja árið. Að loknu námi og standist nemendur kröfur til útskriftar býðst þeim að sækja um framhaldsnám á háskólastigi. Heimsókn nemenda í Fisktækniskólanum í sjókví. Til BS- eða MS-gráðu Háskólinn á Hólum og Háskólinn á Akureyri bjóða í fyrsta skipti næsta vetur upp á sameiginlega námslínu í fiskeldisfræðum. Lengi hefur verið í boði diplómanám í Háskólanum á Hólum og hann hefur verið eini háskólinn á Íslandi sem hefur haldið úti námi í fiskeldi á háskólastigi í um 30 ár. Diplómanámið er til 90 eininga og tekur eitt ár. Námið er afar sérhæft. Meðal námsgreina er hrognakreisting, hrogna- og seiðaeldi allt til áframeldis. „Við sóttum um styrk úr sjóði sem miðar að auknu samstarfi háskólanna í samvinnu við Háskólann á Akureyri, Landbúnaðarháskólann, Háskóla Íslands ásamt Háskólasetri Vestfjarða, Náttúruminjasafninu, Hafrannsóknastofnun og Matís. Hólmfríður Sverrisdóttir, rektor Háskólans á Hólum. Við fengum styrk til þess að skoða sameiginlegt BS-nám í lagareldi á háskólastigi. Úr varð að Háskólinn á Akureyri og Háskólinn á Hólum bjóða núna upp á BS-námslínu í lagareldi í fyrsta sinn. Nemendur skrá sig í námið hjá Háskólanum á Akureyri þar sem þeir taka almenna áfanga sem tilheyra sjávarútvegsfræðinni þar en sérhæfðari lagareldisáfanga á Hólum,“ segir Hólmfríður Sverrisdóttir, rektor Háskólans á Hólum. Við þróun á náminu var horft til þess sem boðið er upp á í sambærilegu námi í Noregi. Hólmfríður segir að háskólarnir séu í raun einungis að svara kalli atvinnugreinarinnar sem í töluverðan tíma hefur kallað eftir námsframboði á háskólastigi. Námið er líka þróað í samráði við atvinnugreinina. „Auk þess erum við að bjóða í fyrsta sinn upp á nám á meistarastigi í lagareldi í samstarfi við alla fjóra opinberu háskólana á Íslandi. Háskólinn á Hólum verður þar heimaháskólinn,“ segir Hólmfríður. Nám meistarastigi hefst í haust. Undanfari að meistaranáminu er BA- eða BS-próf. Nýlega var lokið við fjármögnun innviða og dæluhúss fyrir nýja byggingu Háskólans á Hólum sem verður sérhæft kennslu- og rannsóknarhúsnæði fyrir lagareldi. Húsið, um 1.000 fermetrar að flatarmáli, verður reist á Sauðárkróki. Á næstu vikum verður hönnun sjálfs hússins auglýst. Tölvuteikning af mögulegri útfærslu á nýju húsnæði fyrir lagareldi Háskólans á Hólum sem verður reist á Sauðárkróki. Samstarf skólastiga og atvinnugreinarinnar Segja má að menntakerfið sé nú að svara ákalli atvinnugreinarinnar sem þarf á vel menntuðu starfsfólki að halda í grein sem vex stöðugt að umfangi. Þannig gæti lagareldi orðið sjálfbært á þessu sviði á Íslandi og einstaklingar sem hyggjast starfa í greininni geta sótt sína menntun heima fyrir. Meistaranámið mun tryggja meiri fagmennsku, færni og þekkingu inn í atvinnugreinina. Hólmfríður segir að uppbygging náms á þessu sviði stefni að því að verða til algjörrar fyrirmyndar. Háskólarnir hafi rýnt og aðstoðað við uppbyggingu áfanga í Fisktækniskólanum þannig að nemendur þaðan komi betur undirbúnir inn í háskóla. Samstarfið er mikið á báðum skólastigum og við atvinnugreinina um leið. Háskólinn á Hólum hefur einnig boðið upp á nám á meistarastigi um nokkurn tíma sem kallast MAR-BIO. MAR-BIO er samnorrænt, einstaklingsmiðað 120 ECTS meistaranám, sem boðið er upp á í samstarfi við Háskólann á Hólum, Nord háskólann í Bodö í Noregi og Háskólann í Gautaborg í Svíþjóð. Námið snýr að sjálfbærri framleiðslu og nýtingu sjávarafurða og er hugsað sem þverfagleg tenging milli fiskveiða, fiskeldis og annarrar lífrænnar matvælaframleiðslu í sjó eða ferskvatni, með sérstakri áherslu á nýsköpun og frumkvöðla. Með MAR-BIO sameina norrænir háskólar því krafta sína með það að leiðarljósi að mennta næstu kynslóð sérfræðinga á þessu sviði. Nemandinn öðlast þekkingu og hæfni hvað varðar framleiðslukerfi matvæla í sjó og vötnum og fær tækifæri til að byggja upp tengslanet til áframhaldandi samvinnu við fræðimenn, atvinnugreinina og stjórnvöld, sem og við fyrirtæki í sjávarútvegi.