Jamie Dimon, bankastjóri JPMorgan Chase, varaði bresk stjórnvöld við að ef sértækir skattar á banka verði hækkaðir, komi til þess að Keir Starmer yrði skipt út sem forsætisráðherra, myndi bankasamstæðan falla frá áformum um að fjárfesta í nýjum höfuðstöðvum í London fyrir milljarða dala. Tugir þingmanna Verkamannaflokksins og nokkrir ráðherrar hafa kallað eftir afsögn Starmer vegna slæms gengis flokksins í sveitarstjórnarkosningum í síðustu viku. Í viðtali við Bloomberg var Dimon spurður hvort JPMorgan myndi endurskoða áform um risaframkvæmdir í Canary Wharf hverfinu í ljósi pólitískrar óvissu í Bretlandi. Sjá einnig Byggja langstærstu skrif­stofu­bygginguna í London Hann sagði að pólitísk óvissa sem slík myndi ekki hafa bein áhrif á áformin en ef stjórnvöld yrðu fjandsamleg gagnvart bönkum á ný þá gæti það spilað inn í ákvörðunina. „Ég hef alltaf mótmælt því að við höfum skaðað Bretland á nokkurn hátt. Við höfum sennilega greitt um 10 milljarða dala í viðbótarskatta fram til þessa. Mér finnst það hvorki rétt né sanngjarnt. Ef þetta gengur of langt munum við taka þetta til endurskoðunar.“ JPMorgan Chase, stærsti banki Bandaríkjanna, tilkynnti í nóvember sl. um að hann hyggist reisa stærstu skrifstofublokk Lundúna í Canary Wharf fjármálahverfinu. Bankinn sagðist gera ráð fyrir að heildarfjárfesting í breska hagkerfinu vegna framkvæmdarinnar verði um 9,9 milljarðar punda og áætlað er að um 12 þúsund manns muni starfa í byggingunni. Dimon hefur áður hrósað bæði Starmer og Rachel Reeves, fjármálaráðherra Bretlands. Hann sagði í gær að Starmer væri „klár maður“. Í umfjöllun Bloomberg segir að skuldabréfamarkaðir hafa brugðist harkalega við mögulegri afsögn Starmer vegna ótta um að eftirmaður hans gæti fært ríkisstjórnina lengra til vinstri með hærri sköttum og auknum ríkisútgjöldum.