Hjá átta stærstu sveitarfélögum landsins var árið 2025 talsvert lakara en árið 2024. Þegar litið er til A-hluta sveitarfélaganna, sem er að mestu rekinn með skattfé, sést að afkoma flestra sveitarfélaga versnaði nokkuð milli ára. Þegar kemur að eiginfjárstöðu er Garðabær með hæsta eiginfjárhlutfallið, eða um 42,5%. Næst kemur Reykjanesbær með 34,7%, Kópavogsbær með 34% og Akureyrarbær með 32,9%. Þá er eiginfjárhlutfall Reykjavíkurborgar 28,2%, 22,3% hjá Mosfellsbæ, 18,5% hjá Hafnarfjarðarbæ og 3,8% hjá Árborg, en Árborg hefur snúið blaðinu við eftir að hafa verið með neikvætt eigið fé þrjú ár í röð. Eiginfjárhlutfallið lækkar milli ára hjá Reykjavíkurborg, Hafnarfjarðarbæ og Akureyrarbæ. Hvað skuldahlutfall varðar, það er skuldir og skuldbindingar A-hluta sem hlutfall af tekjum, er það hæst hjá Árborg, eða um 164,3%. Næst á eftir koma Hafnarfjarðarbær með 138,8% og Reykjanesbær með 136,4%. Lægst er hlutfallið hjá Kópavogsbæ, eða 87,7%. Skuldahlutfallið lækkar milli ára hjá Kópavogsbæ, Hafnarfjarðarbæ og Garðabæ en hækkar milli ára hjá Reykjavíkurborg, Reykjanesbæ, Akureyrarbæ, Mosfellsbæ og Árborg. Veltufé frá rekstri, sem segir til um hversu vel rekstur er í stakk búinn til að standa undir afborgunum af lánum og fjárfestingum, var jákvætt hjá öllum stærstu sveitarfélögunum. Veltufé frá rekstri sem hlutfall af tekjum var mest hjá Árborg, eða um 11%, Reykjanesbæ, eða um 10,4%, og Akureyrarbæ, eða 7,8%. Hlutfallið var þá 6,9% hjá Reykjavíkurborg, 6,8% hjá Kópavogsbæ, 5,2% hjá Mosfellsbæ, 4,4% hjá Garðabæ og loks 1,4% hjá Hafnarfjarðarbæ. Veltufé frá rekstri sem hlutfall af tekjum dróst saman milli ára hjá öllum nema Reykjavíkurborg og Kópavogsbæ. Nánar er fjallað um málið í Viðskiptablaðinu . Áskrifendur geta lesið fréttina í heild hér .