Hluta­bréfa­verð Al­vot­ech lækkaði um rúm 9% í við­skiptum dagsins og lokaði í 410 krónum á hlut. Velta með bréf félagsins nam 84 milljónum króna. Lækkunin kemur eftir snarpa hækkun í byrjun vikunnar en á mánu­daginn hækkaði gengi Al­vot­ech um 13,4% í ríf­lega 200 milljóna króna veltu og stóð þá í 440 krónum á hlut. Fyrir opnun markaða á mánu­daginn greindi Al­vot­ech frá því að Mat­væla- og lyfja­eftir­lit Bandaríkjanna, FDA, hefði lokið reglu­bundinni út­tekt á fram­leiðslu­aðstöðu félagsins í Reykja­vík. FDA hóf út­tektina í lok apríl og lauk henni á föstu­daginn. Al­vot­ech sagði í kjölfarið að félagið gerði ráð fyrir að bregðast skjótt við öllum at­huga­semdum eftir­litsins og að þær krefðust ekki veiga­mikilla breytinga eða viðbragða. Þá sagði félagið að niður­staða út­tektarinnar gerði því kleift að senda aftur inn um­sóknir um markaðs­leyfi í Bandaríkjunum þegar öll nauð­syn­leg gögn lægju fyrir. Sjá einnig Alvotech hækkaði um 13% eftir lok úttektar Al­vot­ech hefur sagt að það geri ráð fyrir að senda um­sóknirnar inn á öðrum árs­fjórðungi og að FDA samþykki um­sóknir um markaðs­leyfi á þessu ári. Félagið vonast til þess að fjórar um­sóknir um markaðs­leyfi verði samþykktar af FDA í ár. Þrátt fyrir hækkunina á mánu­daginn hefur gengi Al­vot­ech verið undir þrýstingi. Bréfin hafa lækkað um rúm 9% síðasta mánuðinn, um 35% frá áramótum og tæp 69% á síðustu tólf mánuðum, sam­kvæmt markaðs­gögnum í lok dags. Úr­vals­vísi­talan OMXI15 lækkaði um 0,54% í dag og stóð í 2.796,13 stigum við lokun. Mesta hækkun dagsins var hjá Símanum, sem hækkaði um rúm 4% og stóð í 12 krónum á hlut. Amaroq lækkaði um 4,6% í 164 krónur á hlut. Icelandair lækkaði um tæp 3% og Hampiðjan um rúmt 1%. Mest velta var með bréf Ís­lands­banka, eða 460 milljónir króna. Þar á eftir komu Síminn með 211 milljónir króna og Arion banki með 134 milljónir króna. Heildar­velta með hluta­bréf í Kaup­höllinni nam 1,3 milljörðum króna í 303 við­skiptum.