Ávöxtunar­krafa tíu ára breskra ríkis­bréfa hækkaði um 0,19 pró­sentu­stig í dag og fór í 5,18%. Þegar ávöxtunar­krafa hækkar lækkar verð skulda­bréfa en eftir hækkunina fór krafan í sitt hæsta gildi frá árinu 2008, sam­kvæmt Financial Times. Breska pundið gaf einnig eftir og fór í lægsta gildi gagn­vart Bandaríkja­dal í um mánuð. Pundið lækkaði um 0,5% í 1,334 dali eftir 0,9% lækkun daginn áður. Óróinn á mörkuðum kemur í kjölfar þess að mögu­leg leið Andy Burn­ham, borgar­stjóra Manchester-borgar­svæðisins, inn á breska þingið opnaðist. Josh Simons, þing­maður Verka­manna­flokksins, til­kynnti að hann hygðist segja af sér þing­mennsku í Makerfi­eld, kjör­dæmi nærri Manchester, og þar með yrði boðað til auka­kosningar. Burn­ham þarf að komast á þing til að geta skorað Keir Star­mer á hólm um leið­togastól Verka­manna­flokksins. Hann hefur sagt að hann vilji bjóða sig fram í Makerfi­eld til að færa þær breytingar sem gerðar hafi verið á Manchester-svæðinu yfir á Bret­land allt. Mögu­legt fram­boð Burn­hams hefur aukið áhyggjur fjár­festa af því að nýr leið­togi Verka­manna­flokksins, hvort sem það yrði Burn­ham eða Angela Rayner, fyrr­verandi vara­forsætis­ráðherra, myndi slaka á sjálf­settum reglum breskra stjórn­valda um lántökur og halla á ríkis­fjár­málum. Bresk ríkis­bréf komu verst út á meðal helstu ríkis­skulda­bréfa í við­skiptum dagsins þótt skulda­bréf lækkuðu víða um heim. Áhyggjur af verðbólgu vegna hækkandi olíu­verðs héldu áfram að þrýsta á ávöxtunar­kröfur víða. Brent-hráolía hækkaði um meira en 2% og fór í 108 dali á tunnu. Ávöxtunar­krafa tíu ára bandarískra ríkis­bréfa hækkaði í 4,58% og krafa sam­bæri­legra franskra ríkis­bréfa fór í 3,94%. Langtíma­bréf í Bret­landi urðu sér­stak­lega fyrir þrýstingi. Ávöxtunar­krafa þrjátíu ára breskra ríkis­bréfa hækkaði um allt að 0,2 pró­sentu­stig og fór í 5,85%, sem er hæsta gildi frá árinu 1998. Slík bréf eru næmari fyrir áhyggjum af langtímalántöku ríkisins og verðbólgu. Grein­endur segja að svo­nefnt Burn­ham-álag sé farið að sjást bæði í breskum ríkis­bréfum og pundinu. Pooja Kumra, vaxta­greinandi hjá TD Secu­rities, segir við Financial Times að mögu­leg endur­koma Burn­hams til West­min­ster sé að gerast fyrr en markaðir hafi gert ráð fyrir. Mohit Kumar hjá Jef­feries segir ótta markaðarins vera að Burn­ham verði vinstri­sinnaðri leið­togi og að halli á ríkis­fjár­málum gæti aukist. Það gæti áfram þrýst á pundið og lengri bresk ríkis­bréf. Francesco Peso­le, greinandi hjá ING, segir að reynslan bendi til þess að pundið sé viðkvæmara fyrir mögu­legri valda­töku Burn­hams en annarra fram­bjóðenda vegna af­stöðu hans í ríkis­fjár­málum. Fjár­festar hafa þegar haft áhyggjur af auknu álagi á ríkis­fjár­mál vegna stríðsins í Mið-Austur­löndum og hækkandi olíu­verðs. Mögu­leg leið­toga­barátta innan Verka­manna­flokksins bætir nú við inn­lendum pólitískum áhættuþáttum. Star­mer hefur gefið til kynna að hann muni ekki reyna að koma í veg fyrir að Burn­ham bjóði sig fram í auka­kosningunni. Hann varaði þó við því að leið­toga­kjör myndi skapa „glundroða“ og óvissu fyrir at­vinnulífið.