Meirihluti velferðarnefndar hafnaði því að fá fulltrúa Seðlabanka Íslands á fund vegna gagnrýni bankans á frumvarp félags- og húsnæðismálaráðherra um tengingu bóta almannatrygginga við launavísitölu. Rósa Guðbjartsdóttir, þingmaður Sjálfstæðisflokksins og Sigurður Örn Hilmarsson, varaþingmaður Sjálfstæðisflokksins, vöktu athygli á þessu við upphaf þingfundar í dag. Þau sitja bæði í velferðarnefnd. „Þetta sætir algjörri furðu minni. Hvert er efnahagsstjórn landsins komin þegar hún óttast það að fá fulltrúa Seðlabankans á fund nefndarinnar til þess að fjalla um þau mál sem við erum hér með til umfjöllunar,“ sagði Sigurður Örn. „Ég vek athygli á því í því sambandi að háttvirtur forsætisráðherra gagnrýndi einmitt síðustu ríkisstjórn fyrir að sofa á verðinum og eftirláta Seðlabankanum einn þessa baráttu gegn verðbólgunni og stendur svo fyrir því að Seðlabankinn fái ekki einu sinni að koma á fund þingnefnda okkar til þess að fjalla um risamál.“ Höfnuðu einnig að fá fulltrúa SA fyrir nefndina Rósa sagði að meirihluti velferðarnefndar hafi einnig hafnað því að fá fulltrúa Samtaka atvinnulífsins fyrir nefndina. Hún bætir við að samtökin hafi óskað eftir að koma aftur fyrir nefndina vegna stærðar málsins og þeirra umræðna sem hafi átt sér stað upp á síðkastið. „Í morgun var því hafnað að fleiri kæmu til á milli umræðna til að ræða þetta mál og ræða stöðuna,“ sagði Rósa. „Við erum í rauninni að færa málið aftur inn í þriðju umræðu þegar það er á því stigi að það ætti að vera á byrjunarreit miðað við hve gríðarlega misjafnan skilning aðilar eru að leggja í það.“ Alvarlegar athugasemdir frá Seðlabankanum Seðlabankinn skilaði umsögn um frumvarpið á föstudaginn. Í henni er varað við því að tenging bóta almannatrygginga við launavísitölu muni hækka greiðslur almannatrygginga umfram raunverulega útborguð laun. Bent er á að árshækkun vísitölu heildarlauna hafi að jafnaði reynst um 0,7 prósentum minni en árshækkun launavísitölunnar frá árinu 2009. Seðlabankinn sagði aðgerðina geta aukið á verðbólguþrýsting á sama tíma og bankinn viðhaldi þéttu taumhaldi peningastefnunnar til þess að koma verðbólgu í markmið. Áhrifin geti annars vegar verið bein í formi aukinnar eftirspurnar í hagkerfinu vegna aukinna ráðstöfunartekna bótaþega og hins vegar óbein ef hækkunin leiðir til ósættis á vinnumarkaði um bilið á milli bóta og launa þannig að launakröfur og kröfur um hækkun bóta aukist á víxl. Hvað varðar hinn svokallaða tvöfalda lás, þá segir Seðlabankinn að í núverandi fyrirkomulagi geti mannleg dómgreind gripið inn í, en samkvæmt breytingatillögum frumvarpsins yrði horfið frá slíku mati og þess í stað miðað við uppsafnaða þróun launavísitölu eða vísitölu neysluverðs. Seðlabankinn bendir einnig á að breytingarnar sem frumvarpið felur í sér geti leitt til aukinna ríkisútgjalda og slökunar á aðhaldi ríkisfjármála án þess að það komi fram í útreikningum á því hvernig fjárlög uppfylla skilyrði stöðugleikareglunnar í lögum um opinber fjármál. Þá er einnig bent á að stytting vinnuvikunnar mælist sem hækkun launavísitölu án þess að um hefðbundnar launahækkanir sé að ræða. Bankinn segir erfitt að sjá rök fyrir því að greiðslur almannatrygginga eigi að taka mið af þeirri þróun.