Vil­hjálmur Birgis­son, for­maður Starfs­greina­sam­bandsins, gagn­rýnir stjórn­völd harð­lega í færslu þar sem hann varar við því að stig­magnandi átök í Miðaustur­löndum geti leitt til hækkandi olíu­verðs, meiri verðbólgu og þar með sjálf­virkrar hækkunar á verð­tryggðum skuldum ís­lenskra heimila. Í færslunni lýsir Vil­hjálmur keðju­verkun sem hann segir að endur­taki sig þegar óvissa eykst á olíu­svæðum: olíu­verð hækkar, flutnings­kostnaður hækkar, elds­neytis­verð hækkar og aðföng fyrir­tækja dýrka sem síðan „smitast beint út í verðlag“. Þar með hækki neyslu­vísi­talan og verð­tryggðar skuldir hækki sjálf­krafa. „Ís­lensk heimili eru með um 2.000 milljarða króna í verð­tryggðum skuldum. Bara á síðustu þremur mánuðum hafa þær skuldir hækkað um 50 milljarða króna vegna aukinnar verðbólgu. Fimmtíu milljarðar bættust við höfuðstóla fólks án þess að það tæki ný lán, án þess að það breytti hegðun sinni. Kerfið sér ein­fald­lega um hækkunina,” skrifar Vil­hjálmur. Hann varar við því að ef átökin leiði til frekari hækkunar á olíu­verði geti næsta skref orðið nýtt verðbólgu­skot sem komi „af fullum þunga“ niður á heimilunum í gegnum verð­trygginguna. Í því sam­hengi spyr hann beint út í ábyrgð stjórn­valda og stefnu þeirra. „Hvernig má það vera að stríð og óstöðug­leiki þúsundir kíló­metra í burtu leiði beint til skulda­aukningar á ís­lenskum heimilum? Hvar eru stjórn­völd? Hvar er Alþingi? Hvar er áætlunin til að verja heimilin gegn ytri áföllum? Hvar er um­ræðan um að verð­tryggingin flytji alla verðbólguáhættu beint yfir á launafólk?” skrifar Vil­hjálmur. Hann segir að það sé pólitísk ákvörðun að halda kerfi þar sem alþjóð­leg átök geta þýtt sjálf­virka skulda­aukningu fyrir ís­lenskar fjöl­skyldur. „Á meðan spennan eykst í Miðaustur­löndum eykst óvissan hér heima og ef ekkert er að gert mun næsta verðbólgu­skot lenda af fullum þunga á heimilunum. Spurningin er ein­föld: Ætla stjórn­völd að bregðast við áður en það gerist – eða aftur eftir á?”